Cinco premios de 100 euros impulsan as compras no comercio local da Mariña
A campaña da Volta ao Cole promovida pola Federación de Comercio da Mariña (FCAM) xa ten as súas premiadas. As cinco persoas gañadoras recibiron vales de compra por valor de 100 euros cada un, que poderán utilizar nos negocios adheridos á entidade.
A entrega dos agasallos correu a cargo de José Luis Balseiro e Eva Luaces, presidentes das asociacións de comerciantes da Pontenova e de Burela, respectivamente.
A iniciativa desenvolveuse durante o pasado mes de setembro co obxectivo de incentivar as compras nos establecementos locais durante a volta ás aulas. Para participar no sorteo, as persoas consumidoras debían realizar compras nos negocios asociados e enviar os correspondentes tíckets ao correo electrónico da Mariña Federación.
O sorteo celebrouse o pasado 1 de outubro e permitiu repartir cinco premios, cun importe total de 500 euros para consumir no comercio de proximidade.
Desde a directiva da FCAM agradeceron a confianza depositada nos negocios locais durante o mes de setembro e a participación nesta campaña, coa que buscan apoiar e dar visibilidade ao comercio da comarca.