Política

A dirixente socialista deixa o cargo tras 16 meses á fronte da organización local, nun contexto de tensión interna polo rexeitamento da candidatura de José López Orozco á Cámara Alta

Chus Navarro presentou a súa dimisión como presidenta da executiva local do PSdeG-PSOE en Lugo, un posto que ocupaba desde hai 16 meses. A súa saída prodúcese nun momento de división interna na organización socialista lucense, marcada polas discrepancias arredor da elaboración das candidaturas para as eleccións xerais do próximo 29 de novembro e, especialmente, pola exclusión do exalcalde da cidade José López Orozco da lista ao Senado.

A través da súa portavoz, Ana González Abelleira, o PSOE explicou que Navarro comunicara que a súa renuncia obedecía a circunstancias persoais que lle impedían desenvolver o traballo á fronte da executiva nas condicións que consideraba desexables.

A xa expresidenta da organización local trasladou aos militantes a súa decisión e recoñeceu as dificultades para impulsar unha nova etapa dentro do partido. Navarro, profesora xubilada e antiga responsable da federación de Ensino da UGT, expresou tamén o seu desacordo coa situación de enfrontamento interno e coa imaxe que, ao seu entender, está a proxectar a formación.

A súa dimisión súmase á do alcalde de Láncara, Darío Piñeiro, que tamén abandonou a xestora provincial socialista. As dúas saídas se producen tras a decisión da dirección do partido de non incluír a José López Orozco como cabeza de lista ao Senado, malia que varias agrupacións locais defenderan a súa candidatura.

Ferraz ratifica as candidaturas para o 29N

O Comité Federal do PSOE ratificou as listas electorais da provincia de Lugo propostas pola dirección galega da formación, encabezada polo secretario xeral do PSdeG, José Ramón Gómez Besteiro. A decisión confirma as candidaturas ao Congreso e ao Senado nun intento de pechar a polémica interna, aínda que as discrepancias continúan abertas.

A candidatura ao Congreso estará encabezada por Patricia Otero, avogada de Monforte de Lemos residente en Burela, seguida do concelleiro de Lugo Jorge Bustos. Eva Blanco, de Monterroso, ocupará o terceiro posto e Ismael Carcedo, das Nogais, o cuarto.

No caso do Senado, César Mogo repetirá como cabeza de lista. A principal novidade está na composición dos seguintes postos, xa que o PSOE concorrerá nesta cámara xunto a Frente Amplio. Ana González Abelleira, concelleira en Lugo e antiga secretaria xeral da executiva local, figuraba inicialmente como número dous, pero cederá esa posición ao representante que designe a coalición.

A composición definitiva dependerá de quen ocupe o posto reservado a Frente Amplio e da aplicación da alternancia entre mulleres e homes nas candidaturas. Se a persoa designada é unha muller, González Abelleira quedaría fóra da lista; se é un home, podería pasar ao terceiro posto, que actualmente ocuparía o alcalde de Ribas de Sil, Roberto Castro.

Pola súa banda, José López Orozco solicitou á dirección socialista as actas das votacións internas para a elaboración das listas, despois de quedar fóra da candidatura ao Senado e rexeitar a proposta de ocupar o segundo posto na lista ao Congreso.