Cervo reforza o control das colonias felinas con novos carnés para as persoas voluntarias
O Concello de Cervo continúa reforzando a xestión das colonias felinas do municipio en colaboración coa Asociación Protectora de Animais Coletiñas. A iniciativa busca garantir o benestar dos gatos comunitarios, controlar a súa reprodución e favorecer unha convivencia axeitada coa veciñanza.
Entre as novas medidas figura a elaboración de carnés identificativos para as persoas voluntarias autorizadas que se encargan de alimentar os animais. O obxectivo é identificar quen realiza esta tarefa e mellorar a organización e a coordinación dos coidados.
Ademais, o Concello imprimirá carteis informativos para colocar nas zonas nas que se detectou unha maior concentración de felinos. Os paneis recollerán recomendacións para a cidadanía sobre o respecto aos animais, a importancia de non interferir no seu coidado e a colaboración necesaria para o correcto funcionamento do programa. O Goberno local tamén publicou un bando municipal para lembrar as normas en vigor.
A alcaldesa, Dolores García Caramés, mantivo un novo encontro con Irene García, representante de Coletiñas, para abordar o desenvolvemento destas actuacións e destacar a importancia da colaboración entre a Administración local, a protectora e as persoas voluntarias.
O método CER para controlar a poboación felina
As medidas forman parte do programa municipal baseado no método CER, que consiste na captura, esterilización e retorno dos gatos ao seu lugar de procedencia. Este sistema pretende controlar progresivamente a poboación das colonias, evitar camadas non desexadas e mellorar as condicións de vida dos animais.
O Concello lembra que a alimentación dos gatos comunitarios debe ser realizada por persoas voluntarias autorizadas e de maneira coordinada. Por iso, pide á veciñanza que non lles proporcione comida sen autorización e que non retire nin estrague os comedoiros e refuxios habilitados.
Tamén solicita evitar posibles agresións dos cans aos gatos e lembra que está prohibido abandonar animais ou depositar novas camadas nestes espazos. No caso dos gatos de titularidade particular, deben cumprirse as obrigas legais de identificación mediante microchip e esterilización nos termos establecidos pola normativa vixente.
A colaboración veciñal, clave para o programa
García Caramés agradeceu o traballo altruísta de Coletiñas e das persoas voluntarias que dedican tempo ao coidado dos gatos comunitarios. Segundo a rexedora, a identificación dos coidadores e a instalación de carteis permitirán organizar mellor a alimentación, evitar interferencias e concienciar sobre a tenza responsable dos animais.
O Concello insiste en que a protección das colonias felinas require a implicación conxunta da Administración, da asociación protectora, das persoas voluntarias e da veciñanza, co obxectivo de compatibilizar o benestar animal coa convivencia e o coidado dos espazos públicos.