Cervo reforza a formación do persoal da Piscina Municipal para actuar ante emerxencias cardíacas
O Concello de Cervo deu un novo paso no seu compromiso coa seguridade e a prevención ao organizar unha acción formativa de reciclaxe e actualización sobre o manexo do desfibrilador externo semiautomático (DESA), dirixida ao persoal da Piscina Municipal. O obxectivo da iniciativa é reforzar os coñecementos dos traballadores para que poidan responder con rapidez e eficacia ante unha posible parada cardiorrespiratoria.
A alcaldesa, Dolores García Caramés, asistiu a unha das sesións prácticas do curso para coñecer o seu desenvolvemento e destacar a importancia da formación continua en primeiros auxilios e soporte vital básico. A rexedora subliñou que contar con profesionais preparados resulta fundamental, especialmente en instalacións deportivas e de lecer que reciben diariamente un elevado número de usuarios de diferentes idades.
Neste sentido, García Caramés incidiu en que a capacidade de actuación durante os primeiros minutos dunha emerxencia sanitaria pode ser determinante para aumentar as posibilidades de supervivencia da persoa afectada, polo que considerou imprescindible manter ao persoal permanentemente actualizado neste ámbito.
A formación combina sesións teóricas e exercicios prácticos centrados no uso correcto do desfibrilador e na aplicación dos protocolos de actuación ante unha parada cardiorrespiratoria. O programa está adaptado ás recomendacións máis recentes en reanimación cardiopulmonar e soporte vital básico, incorporando os criterios establecidos polas principais entidades especializadas nesta materia.
O curso conta coa acreditación oficial da Sociedade Española de Medicina de Urxencias e Emerxencias (SEMES) e da Sociedade Española de Reanimación Cardiopulmonar (SERCP), organismos de referencia na formación de profesionais para a atención de emerxencias e na promoción das boas prácticas que contribúen a incrementar a supervivencia nestes casos.
Desde o Concello destacan que este tipo de iniciativas non só melloran a capacitación do persoal municipal, senón que tamén incrementan a seguridade das instalacións públicas e a calidade do servizo prestado á veciñanza, garantindo unha resposta máis eficaz en situacións críticas.
Esta acción formativa enmárcase ademais na estratexia municipal para consolidar unha ampla rede de espazos cardioprotexidos. Na actualidade, dispoñen de desfibriladores a Casa do Concello, a Casa da Cultura, a nave municipal de obras, o CEIP Península da Paz, o IES Marqués de Sargadelos, a Piscina Olímpica Municipal, a Escola Infantil Municipal, o campo de fútbol e o pavillón da Veiga.
A estes recursos súmanse un desfibrilador instalado nun vehículo municipal para facilitar a atención en calquera punto do termo municipal, outro dispoñible durante a tempada de baño na praia do Torno e os equipos existentes no Centro de Día, na Residencia de Maiores e no CEIP de Cervo. O Goberno local traballa agora para ampliar esta cobertura aos locais sociais municipais, co propósito de seguir reforzando a capacidade de resposta ante emerxencias en todo o municipio.