Cervo impulsa un novo bosque autóctono en Río Cobo coa participación do alumnado do IES Marqués de Sargadelos
O Concello de Cervo deu un novo paso na súa estratexia de recuperación ambiental coa creación dun espazo verde de alto valor ecolóxico en Río Cobo. A actuación desenvolveuse nunha parcela municipal na que previamente se levaran a cabo traballos para eliminar exemplares de eucalipto, favorecendo así a restauración da vexetación característica da contorna.
Nesta zona procedeuse á plantación de arredor de trinta árbores autóctonas de diferentes especies, entre elas bidueiros, carballos, freixos, acivros e pradairos. O obxectivo desta intervención é contribuír á formación dun novo bosque integrado na paisaxe local e reforzar a biodiversidade nun enclave próximo ao núcleo urbano.
A actividade contou coa implicación directa do alumnado de 2º da ESO do IES Marqués de Sargadelos, que participou nas tarefas de plantación e tivo a oportunidade de coñecer sobre o terreo a importancia da conservación dos ecosistemas naturais. A experiencia permitiu combinar o traballo práctico cunha vertente educativa centrada no respecto polo medio ambiente e na protección do patrimonio natural.
Durante a xornada estiveron presentes a alcaldesa de Cervo, Dolores García Caramés; a concelleira de Medio Ambiente, Mali Méndez; e o responsable municipal de Xardinería, Óscar Bello, que acompañaron aos estudantes ao longo da actividade e compartiron con eles a relevancia deste tipo de accións para o futuro ambiental do municipio.
A iniciativa estaba prevista inicialmente para a Semana do Medio Ambiente, aínda que as condicións meteorolóxicas adversas obrigaron a modificar o calendario e trasladar a actividade ás últimas semanas do curso escolar.
A alcaldesa destacou que actuacións deste tipo contribúen a construír un concello máis sostible mediante a recuperación de espazos con especies propias do territorio. Segundo sinalou, estas intervencións favorecen a biodiversidade, enriquecen a paisaxe e axudan a conservar os valores naturais da contorna.
Dolores García Caramés subliñou tamén a intención do Concello de continuar apostando pola reforestación das parcelas municipais nas que sexa viable desenvolver este tipo de proxectos, promovendo a substitución de especies menos adecuadas por árbores autóctonas vinculadas á identidade ambiental da zona.
A rexedora quixo salientar ademais o papel da comunidade educativa nestas iniciativas, incidindo en que a participación dos máis novos resulta fundamental para fomentar hábitos de respecto e coidado da natureza. Neste sentido, puxo en valor a colaboración dos centros educativos como unha ferramenta esencial para fortalecer a conciencia ambiental das futuras xeracións.