Cervo impulsa hábitos saudables entre a infancia coa campaña “Misión Comer con Xeito”
O Concello de Cervo continúa a desenvolver a campaña “Misión Comer con Xeito”, unha iniciativa de carácter educativo coa que se pretende promover hábitos de alimentación saudables entre os nenos e nenas do municipio. A proposta está presente tanto na Escola Infantil Municipal como no programa Cervo Madruga, achegando cada mes novos materiais didácticos centrados en produtos de tempada.
A través desta actividade, búscase que os máis pequenos coñezan os alimentos dunha maneira próxima, participativa e entretida, destacando non só as súas características senón tamén os beneficios que achegan ao organismo.
Neste mes de xuño, os protagonistas son o tomate e a sandía, dous alimentos típicos desta época do ano. O tomate preséntase como un froito vermello rico en vitaminas e cun importante valor nutritivo, asociado ao coidado do corazón e á saúde xeral do corpo. Pola súa banda, a sandía destaca polo seu elevado contido en auga, converténdose nunha froita refrescante que axuda a hidratar e a combater as altas temperaturas.
Desde o Concello de Cervo tamén se difundiron os dípticos informativos correspondentes a este mes, co obxectivo de reforzar a aprendizaxe tanto no ámbito escolar como nos fogares. Con esta iniciativa, preténdese consolidar a idea de que a alimentación saudable pode ser unha experiencia educativa, lúdica e compartida.