Cervo impulsa a recuperación da histórica mina submarina situada no monumento á Armada de San Cibrao
O Concello de Cervo e a Asociación Mar de San Ciprián iniciaron unha actuación destinada a asegurar a conservación dun dos elementos máis representativos do patrimonio histórico da localidade: a mina submarina instalada na zona de Miramar, na Pena Meá, formando parte do coñecido monumento á Armada.
Os traballos comezaron coa retirada da peza, unha operación desenvolvida con medios municipais e supervisada pola alcaldesa, Dolores García Caramés, acompañada polo concelleiro Alfredo Fernández e por membros da Asociación Mar de San Ciprián. O obxectivo desta intervención é facilitar a restauración e conservación dun artefacto que constitúe unha das imaxes máis recoñecibles da fachada marítima de San Cibrao.
A histórica mina será trasladada ao Arsenal de Ferrol, onde a Armada asumirá os labores de recuperación para garantir a súa preservación a longo prazo. Durante o tempo que duren estas tarefas, instalarase unha reprodución provisional no emprazamento habitual para manter a presenza deste símbolo nun dos puntos máis visitados da localidade.
A peza forma parte do monumento á Armada desde a súa inauguración en 1967. A súa chegada a San Cibrao remóntase a decembro de 1965, cando foi arrastrada ata a costa polos temporais e as correntes mariñas. Unha vez desactivada pola Armada, converteuse nun recordo permanente dun episodio singular da historia local e nun elemento moi ligado á memoria colectiva dos veciños.
Desde o goberno municipal subliñan a importancia de preservar este legado histórico para as futuras xeracións. Neste sentido, a alcaldesa destacou o valor patrimonial da mina e a necesidade de garantir a súa conservación nas mellores condicións posibles, para que continúe formando parte da identidade de San Cibrao e de Cervo.
A rexedora tamén agradeceu a implicación da Asociación Mar de San Ciprián e a colaboración prestada pola Armada, claves para facer realidade unha actuación que permitirá recuperar e poñer en valor unha peza estreitamente vinculada á tradición marítima e á historia da vila.