Cervo e O Valadouro volverán reunirse na Punta da Carretera cunha xornada de música e gastronomía
A Punta da Carretera converterase este domingo, 30 de agosto, nun punto de encontro entre a veciñanza de Cervo e O Valadouro coa celebración da segunda edición dunha xuntanza promovida polos dous concellos. A iniciativa busca reforzar os vínculos entre ambos municipios a través dunha xornada de convivencia, gastronomía e música.
A programación comezará ás 13.30 horas cunha sesión vermú amenizada polo Dúo Eclipse. Unha hora máis tarde, ás 14.30 horas, será a quenda da comida campestre, para a que se estableceu un prezo de 20 euros por persoa.
O menú estará composto por empanada, churrasco, chourizo e sobremesa, ademais de café, pan, viño e auga. As persoas que desexen participar poden adquirir os seus tíckets contactando con Roberto, no teléfono 671 960 613, ou con Laureano, no 695 106 207.
A celebración prolongarase durante a tarde. Ás 18.00 horas, o Dúo Eclipse volverá encargarse da música cunha nova sesión que dará continuidade ao ambiente festivo.
A organización instalará unha carpa para dispoñer dun recinto cuberto e habilitará inchables gratuítos para os nenos e nenas. A xornada completarase con música na cantina e cunha degustación gratuíta de produtos elaborados con porco celta.
A II Xuntanza na Punta da Carretera pretende dar continuidade a unha iniciativa que aproveita un espazo compartido entre Cervo e O Valadouro para favorecer o encontro entre habitantes dos dous municipios.
Desde a organización animan á veciñanza a participar nunha celebración pensada para todas as idades e coa que se busca estreitar lazos entre os dous concellos arredor da música, a gastronomía e a convivencia.