Cervo convoca as axudas ao transporte escolar e abre a convocatoria para libros e material de Infantil
O Concello de Cervo abriu o prazo para solicitar as axudas ao transporte escolar correspondentes ao curso 2025-2026 e as destinadas á compra de libros e material escolar para o alumnado do segundo ciclo de Educación Infantil. As familias interesadas poderán presentar as solicitudes ata o 12 de novembro, incluído, no Rexistro Xeral do Concello.
No caso das axudas ao transporte escolar, o Concello reserva unha partida de 12.000 euros de fondos municipais para apoiar o alumnado menor de 30 anos que teña que desprazarse fóra do municipio para cursar estudos que non se impartan nos centros educativos de Cervo.
A convocatoria contempla achegas de 150 ou 250 euros, en función da renda familiar, e está dirixida a estudantes universitarios, alumnado de conservatorios ou escolas de música, persoas que cursen modalidades de Bacharelato non dispoñibles no municipio e estudantes de ciclos medios ou superiores de Formación Profesional, sempre que cumpran os requisitos establecidos nas bases.
As persoas solicitantes deberán entregar a documentación requirida, entre a que figuran as fotocopias dos documentos nacionais de identidade dos membros da unidade familiar maiores de idade, o libro de familia, as autorizacións para consultar información doutras administracións e a documentación académica que acredite os estudos realizados durante o curso 2025-2026. Cando corresponda, tamén será necesario achegar o certificado oficial de discapacidade ou dependencia.
As bases completas poden consultarse na Casa do Concello, na Casa da Cultura e na sede electrónica municipal.
Axudas para libros e material escolar en Educación Infantil
O Concello tamén abriu o prazo para solicitar as axudas destinadas á adquisición de libros e material escolar para o alumnado do segundo ciclo de Educación Infantil dos dous centros educativos do municipio que imparten estas ensinanzas: o CEIP Península da Paz e o CEIP de Cervo.
As familias deberán presentar as solicitudes no Rexistro Xeral do Concello xunto coa documentación requirida, que inclúe as fotocopias dos documentos nacionais de identidade dos membros da unidade familiar, unha copia do libro de familia, a autorización para obter a información necesaria das distintas administracións públicas e a factura da compra ou un orzamento do material escolar nun establecemento comercial do municipio.
Os impresos de solicitude e as bases da convocatoria están dispoñibles na Casa da Cultura, no Concello de Cervo e no taboleiro de anuncios da sede electrónica municipal.
A alcaldesa de Cervo, Dolores García Caramés, destacou que apoiar as familias e contribuír a aliviar os gastos que supón o inicio do curso escolar é unha prioridade para o Concello. Segundo sinalou, estas axudas buscan facilitar a adquisición do material necesario para os máis pequenos e, ao mesmo tempo, animar as familias a realizar as compras nos establecementos do municipio para apoiar o comercio local.
Con estas dúas convocatorias, o Concello de Cervo mantén o seu apoio ás familias, favorece a igualdade de oportunidades no acceso á educación e contribúe a reducir os gastos asociados tanto aos desprazamentos para cursar estudos fóra do municipio como á adquisición do material escolar.