Cervo combina un magosto con música en Trasbar e unha exposición de arte xaponesa en San Cibrao

AMariñaXa
O Guateque de Arruguiñas celebrarase este sábado 21 de novembro con castañas, panceta e música do dúo Caramelo
Guateque de Arruguiñas Cervo
20 Nov 2026

O Concello de Cervo programa para esta fin de semana dúas actividades culturais e de lecer en Trasbar e San Cibrao, con propostas que combinan a música e a tradición popular coa pintura e a cultura xaponesa.

A primeira cita será este sábado 21 de novembro no Local Social de Trasbar, onde se celebrará unha nova edición do Guateque de Arruguiñas, que se suma ao magosto organizado pola Asociación de Veciños do Burgo de Trasbar. A programación comezará ás 20:00 horas cunha festa na que haberá castañas asadas, bocadillos de panceta e animación. Xa ás 22:00 horas, o dúo Caramelo ofrecerá música en directo para animar a noite e convidar os asistentes a bailar.

A segunda proposta chegará o luns 23 de novembro, ás 12:00 horas, coa inauguración na Casa da Cultura de San Cibrao da exposición 'Outono e camiños da arte xaponesa', da pintora Ángeles Costafreda.

A mostra reúne arredor de 56 traballos nos que a natureza, a calma e a meditación ocupan un lugar protagonista. A través de diferentes técnicas e disciplinas, o público poderá achegarse á estética e á sensibilidade da arte xaponesa mediante pinturas outonais, composicións de sumi-é, caligrafías xaponesas, haikus, monotipos gelli prints e pinturas acrílicas.

Desde o Concello de Cervo animan a veciñanza a participar nestas dúas iniciativas, que ofrecen diferentes alternativas para compartir momentos de convivencia, apoiar a actividade asociativa e achegarse ás expresións culturais e artísticas.

0.1512279510498