Celeiro reúne ao sector pesqueiro do 5 ao 7 de novembro nas XXX Xornadas de Pesca
O porto de Celeiro, en Viveiro, converterase do 5 ao 7 de novembro nun punto de encontro para o sector pesqueiro coa celebración da XXX edición das Xornadas de Pesca.
A cita, considerada a Universidade do Mar, reunirá representantes das organizacións pesqueiras, investigadores, responsables institucionais e profesionais para debater sobre os desafíos económicos, ambientais e tecnolóxicos que afronta a actividade.
O programa desta edición especial, que conmemora tres décadas de traxectoria, combinará relatorios e mesas de debate sobre a sustentabilidade dos recursos mariños, a competitividade da frota, a política pesqueira europea e as transformacións que marcarán o futuro do sector. A participación será gratuíta e poderá realizarse tanto de maneira presencial como en liña.
Sustentabilidade, innovación e futuro da frota
A primeira xornada, o xoves 5 de novembro, abrirase ás 9.30 horas co acto inaugural, no que intervirá a conselleira do Mar, Marta Villaverde Acuña. A continuación, os relatorios centrarán a atención na protección da vida mariña e nos proxectos REDUCE e LIFE CIBRiNA, así como no papel das comunidades pesqueiras na conservación dos océanos.
A innovación alimentaria, a cooperación tecnolóxica e a incorporación de novas profesións á actividade pesqueira completarán os debates da mañá. Pola tarde, a atención trasladarase ás políticas europeas, ás dificultades da frota e ao papel da dixitalización e da intelixencia artificial na toma de decisións.
Investigadores e especialistas analizarán tamén os cambios que experimentan os ecosistemas mariños e os desafíos da gobernanza pesqueira na Unión Europea, nun contexto no que a adaptación ambiental e a viabilidade económica da actividade son cuestións centrais.
Eólica mariña e relevo xeracional, entre os debates do venres
A segunda xornada, o venres 6 de novembro, comezará cunha reflexión sobre a eólica mariña, a transición enerxética e as oportunidades que poden xurdir para o sector marítimo. O programa abordará igualmente os efectos económicos e sociais dos novos usos do mar e os posibles conflitos entre actividades.
A competitividade da pesca europea, a descarbonización dos buques sen perder rendibilidade e a incorporación de novas xeracións ao sector serán outros dos asuntos destacados. Tamén se analizará a dependencia europea das importacións de peixe procedente de terceiros países e a importancia de manter unha frota propia.
Na sesión da tarde, os participantes tratarán cuestións como a resiliencia climática, a gobernanza dos océanos, a xestión dos recursos e o control da actividade pesqueira. O programa pechará a xornada con debates sobre o futuro do palangre e os desafíos aos que se enfronta esta modalidade de pesca.
A política pesqueira europea e o papel de Galicia pecharán as xornadas
O sábado 7 de novembro, última xornada do encontro, estará centrado nas decisións que determinarán o futuro da pesca nas próximas décadas. A supervivencia da frota europea, o equilibrio entre sustentabilidade e burocracia e as posibilidades de pesca para garantir a actividade da frota española serán algúns dos temas principais.
A secretaria xeral de Pesca do Ministerio de Agricultura, Pesca e Alimentación, María Isabel Artime García, participará nun relatorio sobre a xestión dos recursos e as posibilidades de captura. Pola súa banda, a conselleira do Mar, Marta Villaverde, abordará o modelo de pesca que Galicia e Europa necesitan para as próximas décadas.
Un dos momentos destacados da última xornada será a homenaxe do sector pesqueiro de Celeiro ao Centro Tecnolóxico do Mar-Fundación CETMAR polo seu 25 aniversario. O recoñecemento pretende poñer en valor a súa contribución á investigación mariña, á innovación tecnolóxica, á cooperación internacional e á difusión do coñecemento sobre os océanos.
O acto contará coa presentación de Antonio Nores Quesada e coa intervención de Rosa Chapela Pérez, directora xerente da Fundación CETMAR. A clausura das XXX Xornadas de Pesca está prevista para as 13.00 horas.
As sesións desenvolveranse no porto de Celeiro e poderán seguirse tamén a distancia, nunha edición que busca reunir o sector arredor dos principais retos da pesca e das decisións que condicionarán a súa evolución nos próximos anos.