Celeiro honra á Virxe do Carme cunha multitudinaria procesión marítima e unha emotiva homenaxe aos mariñeiros
A vila mariñeira de Celeiro viviu este domingo unha das xornadas máis destacadas das súas Festas Patronais e do Mar coa celebración da tradicional procesión marítima da Virxe do Carme, unha cita que reuniu a centos de veciños e visitantes arredor dunha das tradicións máis arraigadas da costa lucense.
A imaxe da patroa dos mariñeiros percorreu a ría de Viveiro a bordo dunha embarcación, acompañada por numerosas naves que participaron nun desfile marítimo marcado pola emoción e a devoción. Durante o percorrido tivo lugar a habitual ofrenda floral en memoria dos mariñeiros falecidos, un dos momentos máis solemnes da celebración, antes do regreso da Virxe ao porto para iniciar a procesión terrestre ata a igrexa parroquial.
A programación continuou cunha misa solemne, seguida da procesión polas rúas de Celeiro, acompañada pola Banda Naval, nun ambiente festivo no que se mesturaron a tradición relixiosa e a identidade mariñeira da localidade. A xornada completarase pola tarde con actividades dirixidas aos máis pequenos e pequenas.
Entre as autoridades asistentes estiveron a presidenta da Deputación de Lugo, Carmela López; a conselleira do Mar, Marta Villaverde; a alcaldesa de Viveiro, Mariña Gueimunde, e o patrón maior da Confraría de Pescadores de Celeiro, Domingo Rey, ademais doutros representantes institucionais e do sector pesqueiro.
Durante a celebración, Marta Villaverde puxo en valor o fondo vínculo que une Celeiro coa actividade pesqueira e destacou que tradicións como a procesión da Virxe do Carme representan a historia, a cultura e o sentimento de pertenza das comunidades costeiras ao mar. A conselleira subliñou tamén o papel fundamental do sector pesqueiro no desenvolvemento económico e social do litoral galego e a importancia de conservar unhas tradicións transmitidas de xeración en xeración.
A procesión marítima volveu converterse así no acto central das Festas Patronais e do Mar de Celeiro, unha celebración que cada ano rende homenaxe aos homes e mulleres do mar e reafirma a estreita relación desta vila mariñeira coa pesca e coas súas tradicións.