Carro Tarabelo e o Concello impulsan unha xornada de sendeirismo e sensibilización sanitaria na Pontenova
A Asociación Carro Tarabelo e o Concello da Pontenova organizarán o vindeiro 6 de xuño a Ruta Galaico-Asturiana, unha iniciativa de carácter social e divulgativo creada co obxectivo de sensibilizar á poboación sobre a EPOC e o Déficit de Alfa-1 Antitripsina a través dunha xornada que combinará natureza, actividade física e convivencia.
A proposta conta tamén coa colaboración de Alfa España e EPOC España —Asociación Española de Pacientes e Coidadores de EPOC— e desenvolverase nun percorrido de sendeirismo entre San Tirso de Abres e A Pontenova, cun itinerario de dificultade baixa-media pensado para facilitar a participación dun amplo número de persoas.
Desde a organización destacan que a actividade nace coa intención de crear un espazo de encontro e apoio para persoas afectadas por enfermidades respiratorias, ao tempo que se promove a importancia dos hábitos saudables e da concienciación social arredor destas patoloxías.
A xornada arrancará pola mañá na Praza dos Fornos da Pontenova, punto no que se realizará a concentración dos participantes antes do traslado en autobús ata o inicio da ruta. O percorrido concluirá novamente na vila pontenovesa cun xantar de confraternidade pensado para fomentar a convivencia entre asistentes, familiares e acompañantes.
Un dos aspectos nos que máis quixeron incidir Carro Tarabelo e o Concello é no carácter accesible da actividade. Por este motivo habilitarase apoio en vehículo para aquelas persoas que poidan precisar asistencia ao longo do percorrido, facilitando así que persoas con limitacións respiratorias ou físicas tamén poidan participar na experiencia.
A ruta forma parte das actividades que a recentemente creada Asociación Carro Tarabelo está a impulsar arredor da promoción do patrimonio, do territorio e das iniciativas sociais vinculadas á saúde e á participación veciñal.
A organización sinala ademais que a proposta busca converterse nunha xornada aberta a persoas de todas as idades, combinando deporte suave, sensibilización sanitaria e contacto coa natureza nun ambiente pensado para compartir experiencias e reforzar a conciencia colectiva sobre a realidade das enfermidades respiratorias.