Deportes

O Concello celebrou unha emotiva cerimonia para o Burela FSF tras conquistar a súa sétima Copa da Raíña, e continuará este domingo cos recoñecementos ao equipo masculino e aos veteranos

Burela viviu este venres unha tarde cargada de emocións e orgullo colectivo. O Concello rendeu homenaxe ao equipo feminino do Burela FS, que vén de alzarse coa súa sétima Copa da Raíña, consolidando unha vez máis o seu lugar privilexiado no fútbol sala nacional. O acto celebrouse no Pavillón Vista Alegre, pouco antes do partido fronte ao CFS Gran Canaria Teledeportivo, e contou coa presenza dunha veciñanza entregada que non quixo perder a oportunidade de acompañar ás súas campioas neste novo fito histórico.

Durante a cerimonia, o goberno local puxo en valor “a entrega, a constancia e a paixón” das xogadoras, que, co seu traballo diario, non só acumulan títulos senón que proxectan o nome de Burela máis alá das fronteiras galegas. “É un orgullo para toda a vila”, destacaron os representantes municipais, que animaron ao equipo a continuar facendo historia.

A festa do deporte burelés non remata aquí. O domingo 11 de maio, ás 12:00 horas no campo da Marosa, terá lugar outro acto de recoñecemento múltiple. Por unha banda, homenaxearase ao equipo masculino da SD Burela polo seu ascenso á Preferente, un logro que lle permite seguir medrando como referente do fútbol na comarca. Por outra, tamén se distinguirá aos veteranos da SD Burela, flamantes campións da Liga de Veteranos División de Honra da provincia de Lugo.

Con estes actos, o Concello de Burela reafirma o seu compromiso co deporte local e a vontade de celebrar os éxitos compartidos, nun momento no que a vila vive un dos seus mellores momentos deportivos dos últimos anos.