Burela vivirá un verán a todo fútbol co Torneo Sub-19 e Sub-16 nos Campos da Marosa
O deporte rei tomará protagonismo este mes de xullo en Burela coa celebración dun novo Torneo de Fútbol 7 nas categorías Sub-19 e Sub-16. A cita terá lugar nos Campos da Marosa e está organizada pola área de Deportes do Concello de Burela e pola agrupación de Veteranos da S.D. Burela. A competición promete ser unha festa do deporte xuvenil, reunindo equipos de toda a comarca e fomentando a participación e o compañeirismo.
As inscricións están abertas ata o 10 de xullo e o número de prazas é limitado. O custo por equipo é de 150 euros, dos cales se devolverán 100 ao rematar o torneo se se cumpren todas as normas establecidas pola organización.
Cada equipo poderá contar cun máximo de 12 xogadores ou xogadoras, e só se permitirán novas fichaxes durante a fase de grupos para completar os 12 integrantes inscritos.
O torneo estrutúrase en dúas categorías. A Sub-19 está aberta a rapaces nados entre 2006 e 2009, admitíndose como máximo 4 xogadores do ano 2006 e 4 do 2007, mentres que se require a presenza mínima de 4 xogadores Sub-2008. En cada partido será obrigatorio que polo menos dous deses xogadores máis novos estean en campo.
A categoría Sub-16 abrangue a mozos e mozas nacidos entre 2009 e 2011, con normas similares: un máximo de 4 xogadores do ano 2009, outros 4 do 2010, e un mínimo de 4 xogadores Sub-2011. Tamén neste caso, durante todo o encontro deberán estar en xogo polo menos dous membros desa franxa máis nova.
O torneo contará con trofeos para os tres primeiros clasificados de cada categoría, e augúrase un ambiente deportivo e familiar nos Campos da Marosa. As persoas interesadas en participar poden escribir ao correo electrónico actividadesdeportivas@burela.org.
Desde a organización destacan que este tipo de iniciativas “son fundamentais para dinamizar o verán, darlle protagonismo á mocidade e fomentar valores como a convivencia, o respecto e o esforzo colectivo”.