Burela ofrece un novo curso de español para persoas estranxeiras con 80 horas de formación
Burela porá en marcha o vindeiro luns, 14 de setembro, un novo curso de español destinado a persoas estranxeiras, unha iniciativa desenvolvida da man de Ecos do Sur coa finalidade de facilitar a súa integración social e administrativa no municipio.
A formación prolongarase ata o 9 de outubro e contará cun total de 80 horas lectivas. As clases impartiranse de luns a venres, en horario de 9.30 a 13.30 horas, nas instalacións do Centro de Formación Ocupacional.
A iniciativa busca proporcionar aos participantes coñecementos lingüísticos que lles permitan desenvolverse con maior autonomía no seu día a día, ademais de facilitar a comunicación e a realización de diferentes trámites.
O concelleiro de Inmigración, Mario Pillado, destacou a importancia de continuar impulsando este tipo de accións formativas para a poboación estranxeira residente en Burela.
Segundo explicou, estas propostas permiten "facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa".
O curso súmase así ás iniciativas orientadas a favorecer a inclusión da poboación migrante e a eliminar as barreiras lingüísticas que poden dificultar a súa participación na vida social e cotiá do municipio.