Burela conmemora o Día Mundial da Pesca cun documental de Adrián Canoura e unha degustación de produtos do mar
A Fundación Expomar organizará o vindeiro domingo 22 de novembro en Burela unha xornada especial para conmemorar o Día Mundial da Pesca, unha efeméride que se celebra internacionalmente cada 21 de novembro. A iniciativa conta co apoio da Consellería do Mar da Xunta de Galicia e coa colaboración do Concello de Burela, e combinará cultura, memoria mariñeira e gastronomía arredor dos produtos do mar.
A programación comezará ás 12.00 horas na Casa da Cultura coa preestrea do documental 'Fomos Ficando Sós', dirixido polo cineasta burelés Adrián Canoura. A proxección dará paso a unha charla-coloquio na que se abordarán cuestións relacionadas coa memoria e a identidade mariñeira, ofrecendo un espazo para compartir reflexións sobre a cultura vinculada ao mar.
A celebración continuará pola tarde, ás 14.30 horas, na Praza de Abastos, onde terá lugar unha degustación gastronómica de produtos do mar. A actividade estará acompañada pola música de Dani de Castro, que completará unha proposta pensada para poñer en valor os recursos mariños e a súa presenza na tradición e na vida cotiá da localidade.
Con esta convocatoria, a Fundación Expomar quere participar na conmemoración dunha data de alcance internacional e reforzar o seu labor de promoción e divulgación do sector pesqueiro. A entidade tamén busca contribuír á conservación da cultura mariñeira e á transmisión deste patrimonio ás novas xeracións, mantendo viva a memoria dunha actividade fundamental para a identidade de Burela e da súa contorna.