Burela amplía as prazas Bica e arrinca para mellorar a mobilidade
O Concello de Burela continúa a súa aposta por unha mobilidade máis eficiente e accesible coa ampliación das prazas Bica e arrinca. Estes aparcadoiros especiais, deseñados para facilitar a subida e baixada de menores e persoas con mobilidade reducida, establécense agora tamén en puntos estratéxicos como centros sanitarios e farmacias.
As prazas Bica e arrinca, identificadas pola súa cor vermella e a sinalización vertical, permiten un estacionamento máximo de 10 minutos. A iniciativa xurdiu en 2024 para mellorar a fluidez na entrada e saída dos colexios, evitando acumulacións de tráfico e reforzando a seguridade. Tras a boa acollida, e atendendo ás solicitudes da veciñanza, o Concello decidiu estendelas a outros servizos esenciais.
Así, xa se instalaron novas prazas na rúa Súafonte, preto do centro de saúde, e proximamente colocaranse outras dúas na avenida Arcadio Pardiñas: unha á altura do número 97 e outra fronte á ortopedia da mesma rúa.