Burela acollerá un faladoiro sobre o proceso de regularización extraordinaria de persoas migrantes
O Concello de Burela organizará o vindeiro xoves 23 de abril, entre as 10.00 e as 12.00 horas, un faladoiro informativo centrado no proceso de regularización extraordinaria aprobado recentemente polo Ministerio de Inclusión, Seguridade Social e Migracións.
A actividade, que se celebrará na Casa do Concello, forma parte do programa Nnabata e contará coa participación de persoal técnico da entidade Arraianas, que achegará información detallada sobre os requisitos, procedementos e implicacións desta medida lexislativa.
O encontro está dirixido a persoas interesadas en coñecer de primeira man as claves deste proceso e resolver dúbidas relacionadas coa súa aplicación. Co fin de garantir unha mellor organización, será necesario confirmar previamente a asistencia a través dos teléfonos habilitados polo Concello.
O tenente de alcaldesa, Mario Pillado, explicou que, en función da demanda, non se descarta a posibilidade de convocar unha segunda sesión. Segundo indicou, o obxectivo é facilitar o acceso á información a todas as persoas interesadas en condicións axeitadas e cunha atención adecuada.
Esta iniciativa enmárcase na liña de actuacións impulsadas polo Concello para apoiar á poboación migrante, ofrecendo recursos informativos e ferramentas que contribúan á súa integración e ao exercicio dos seus dereitos.