Burela abre as inscricións para unha nova edición do programa estival Somos Verán
O Concello de Burela abrirá este xoves, 11 de xuño, o prazo de inscrición para participar en Somos Verán 2026, o programa municipal de actividades estivais dirixido á infancia. A iniciativa desenvolverase ao longo dos meses de xullo e agosto e está orientada a nenas e nenos das etapas de Educación Infantil e Primaria.
As propostas levaranse a cabo nas instalacións do CEIP Os Castros e incluirán diferentes actividades lúdicas, educativas e de ocio adaptadas ás distintas idades. O obxectivo é ofrecer unha alternativa de lecer durante as vacacións escolares, ao tempo que se facilita a conciliación das familias durante o período estival.
O programa estrutúrase en catro quendas. A primeira celebrarase entre o 1 e o 14 de xullo; a segunda, do 15 ao 28 de xullo; a terceira, do 29 de xullo ao 11 de agosto; e a cuarta e última desenvolverase entre o 12 e o 25 de agosto.
Os participantes poderán desfrutar de talleres, xogos, obradoiros e outras actividades deseñadas para fomentar a convivencia, a creatividade e a aprendizaxe nun contexto de lecer.
O prazo para formalizar as inscricións permanecerá aberto ata o 15 de xuño. As solicitudes poderán presentarse a través do correo electrónico gaia@burela.org ou de maneira presencial na oficina de Gaia. O Concello tamén puxo á disposición das familias as bases da convocatoria e o formulario de inscrición para consultar todos os detalles do programa.