Política | Eleccións

O líder do PSdeG, acompañado por Patricia Otero e César Mogo, contrapón o modelo socialista ao que atribúe ao PP e alerta das consecuencias que terían posibles recortes na provincia de Lugo

O secretario xeral do PSdeG-PSOE, José Ramón Gómez Besteiro, situou a defensa das pensións públicas como un dos asuntos centrais das eleccións do 29 de novembro durante un acto celebrado en Foz. O dirixente socialista lembrou que arredor de 100.000 persoas perciben unha pensión pública na provincia de Lugo e que estas prestacións representan aproximadamente o 30% dos ingresos dos fogares. Por iso, advertiu da repercusión que calquera modificación do sistema podería ter na economía provincial.

Besteiro participou no encontro acompañado pola cabeza de lista ao Congreso, Patricia Otero, e polo número un ao Senado, César Mogo. Tamén asistiron a secretaria de Organización do PSdeG, Lara Méndez, e o alcalde de Foz, Fran Cajoto. Durante a súa intervención, o líder dos socialistas galegos defendeu que "as pensións son un dereito, non son un regalo, ningún agasallo" e presentou a cita electoral como unha elección entre dúas formas de entender o futuro das prestacións públicas.

"O 29 de novembro tamén vai ir disto, de decidir se optamos por quen fortalece o sistema de pensións, por quen non quere recortar as pensións, ou se entra a motoserra e os que recortan as pensións", afirmou. O secretario xeral lembrou que Lugo, xunto con Ourense, figura entre as provincias nas que os pensionistas teñen un maior peso sobre o conxunto da poboación. Nese escenario, considerou que calquera axuste nas prestacións tería consecuencias económicas especialmente importantes.

O dirixente socialista puxo como exemplo a evolución da pensión media de xubilación durante os últimos oito anos, que, segundo indicou, pasou de arredor de 1.000 euros a superar os 1.500. Atribuíu esta evolución á actualización das prestacións conforme ao IPC e ao reforzo do sistema público e do seu Fondo de Reserva. Fronte a iso, acusou a outras formacións de pretender reducir as pensións e pediu que o electorado valore a utilidade do seu voto para garantir a continuidade do modelo.

Besteiro chamou a concentrar o apoio nas candidaturas socialistas entre as persoas que defenden o sistema público e asegurou que, ao seu xuízo, outras opcións non permitirían frear posibles recortes. "O 29N vai ser unha data que a xente vai lembrar onde estaba e que foi o que votou", afirmou, antes de insistir en que a decisión se sitúa entre dous modelos.

Pola súa banda, Patricia Otero centrou parte da súa intervención nas posicións do Partido Popular sobre a revalorización das pensións. A candidata ao Congreso cuestionou o compromiso expresado por Alberto Núñez Feijóo de actualizar as prestacións conforme ao IPC e lembrou que os populares votaron en contra, en 2021, da norma impulsada polo Goberno de Pedro Sánchez que blindou legalmente esa actualización.

Otero tamén apelou á etapa de Mariano Rajoy na presidencia do Goberno, durante a que, segundo recordou, se eliminou a vinculación das pensións co IPC e as prestacións subiron un 0,25% durante catro anos, mentres o custo da vida aumentaba por riba desa porcentaxe.

A candidata reivindicou a xestión socialista tanto na mellora das prestacións como na recuperación do Fondo de Reserva. Segundo os datos que achegou, a hucha das pensións contaba con 5.000 millóns de euros en 2018 e superou os 15.000 millóns esta primavera, coa previsión de achegarse aos 20.000 millóns ao remate do ano. Como seguinte obxectivo, anunciou a intención de incorporar a garantía das pensións á Constitución. "Mentres uns queren privatizar e recortar, nós os socialistas queremos garantir este dereito na Constitución española", resumiu.

O candidato ao Senado, César Mogo, tamén criticou as declaracións realizadas por unha candidata do PP por Ourense sobre a perda de poder adquisitivo dos pensionistas. Mogo sostivo que esa situación se producía co modelo popular e defendeu que a normativa aprobada polo Goberno socialista permitiu manter o poder adquisitivo das prestacións.

O senador cuestionou ademais a posición do PP sobre a sustentabilidade do sistema público e referiuse ás declaracións da súa portavoz no Congreso durante a precampaña, nas que advertira de que o modelo podía colapsar. Fronte a esa visión, asegurou que as pensións están garantidas polo aumento do emprego e das cotizacións, así como pola evolución da débeda. Mogo concluíu que, na súa opinión, as propostas populares suporían regresar a un escenario de prestacións por debaixo do custo da vida.