Barreiros pon en marcha a Carreira e Andaina Solidaria de Reis para comezar o ano con deporte e compromiso social
O Concello de Barreiros aposta por iniciar o novo ano cunha proposta que combina exercicio físico, convivencia e solidariedade. Trátase da Carreira e Andaina Solidaria de Reis, unha actividade programada para o domingo 4 de xaneiro e que busca implicar á veciñanza nun xesto colectivo a favor dunha causa social.
As inscricións para participar na carreira xa están dispoñibles e, nesta edición, establécense tres tramos de prezos segundo a data de rexistro: 5 euros ata o 21 de decembro, 7 euros ata o día 28 e 9 euros ata o 1 de xaneiro. Ademais, no momento de formalizar a inscrición existe a opción de engadir unha achega solidaria que se destinará integramente á asociación lucense “Somos Unidos por el Cáncer”, entidade que desenvolve unha intensa labor de apoio, sensibilización e divulgación no ámbito oncolóxico.
En canto á andaina solidaria, o Concello anuncia un cambio de percorrido para este 2025. As persoas participantes poderán gozar dun roteiro diferente, que atravesará o xuncal, a lagoa de Pallares e a contorna da ría de Masma, cunha alternativa máis curta de 8 quilómetros e outra algo máis esixente, de 13 quilómetros.
O custo de participación na andaina é de 3 euros, unha contía que será doada na súa totalidade á mesma asociación beneficiaria, convertendo este paseo colectivo nunha mostra de apoio e implicación comunitaria.
A organización lembra que toda a información, así como o acceso ás inscricións, está dispoñible na web do Circuíto de Carreiras Populares: www.maiskmsbarreiros.gal.
.