Barreiros e Burela achegarán en novembro a historia de Prisciliano e a súa relación coa Gallaecia
A figura de Prisciliano será protagonista en novembro de dous encontros divulgativos que se celebrarán en Barreiros e Burela dentro da iniciativa promovida pola área de Cultura da Vicepresidencia da Deputación de Lugo para achegar a diferentes concellos da provincia o documental "Prisciliano e a Gallaecia".
A proposta busca facilitar o coñecemento sobre a vida do bispo, o seu pensamento e o contexto histórico no que desenvolveu a súa actividade, así como sobre a súa relación coa Gallaecia. Para iso, as sesións contarán coa participación de diferentes persoas vinculadas ao documental e ao estudo desta figura histórica.
Nos encontros estarán presentes Aser Álvarez, director do documental; o historiador Diego Piay; Victorino Pérez, experto en Prisciliano, e Xabier Correa Corredoira, integrante do equipo artístico.
A deputada de Cultura, Iria Castro, salientou o interese desta produción audiovisual, que definiu como "o primeiro" documental realizado sobre a vida de Prisciliano. Segundo sinalou, a iniciativa pretende contribuír a divulgar unha figura cuxa relevancia histórica está xa recoñecida no ámbito académico, pero que, ao seu xuízo, non foi suficientemente achegada á sociedade.
A programación ampliarase ademais coa creación dun podcast dedicado a Prisciliano. Este novo contido permitirá afondar na súa biografía, na influencia do seu pensamento e no período histórico no que viviu, ademais de abordar a súa vinculación coa Gallaecia.
As dúas actividades previstas na Mariña desenvolveranse en Barreiros o venres 13 de novembro e en Burela o domingo 15 de novembro, dentro desta programación provincial de divulgación arredor da figura de Prisciliano.