Barreiros contará cun novo servizo de podoloxía para mellorar a atención ás persoas maiores
O Concello de Barreiros incorporará nos próximos meses un servizo de podoloxía destinado ás persoas maiores do municipio grazas a un convenio de colaboración aprobado pola Deputación de Lugo e dotado con algo máis de 40.000 euros. A iniciativa, impulsada desde a área de Servizos Sociais, busca ampliar os recursos de atención á veciñanza e facilitar o acceso a coidados especializados.
O acordo, que terá vixencia ata o ano 2028, contempla dúas actuacións principais. Por unha banda, permitirá a adquisición de novo material informático e de oficina para mellorar o funcionamento dos servizos municipais. Entre os equipamentos previstos figuran ordenadores, arquivadores e unha cadeira hidráulica. Por outra, posibilitará a creación dun servizo de podoloxía mediante a contratación dun profesional especializado.
A tenente de alcaldesa e concelleira de Servizos Sociais, Carmen Veiga, explicou que este novo recurso estará dirixido ás persoas maiores de 65 anos empadroadas no municipio. Tamén poderán beneficiarse do servizo pacientes derivados desde o centro de saúde por patoloxías que requiran atención podolóxica específica, como ocorre nalgúns casos de diabetes, así como persoas en situación de vulnerabilidade social que necesiten este tipo de asistencia.
As citas serán xestionadas a través dos Servizos Sociais municipais e a prestación desenvolverase durante o que resta de 2026 e ao longo dos anos 2027 e 2028.
Segundo sinalou Carmen Veiga, o coidado dos pés resulta fundamental para preservar a mobilidade, a autonomía persoal e a calidade de vida das persoas maiores. A responsable municipal destacou que moitos veciños atopan dificultades para acceder a determinados tratamentos ou acaban pospoñendo a atención de problemas que, co paso do tempo, poden afectar ao seu benestar diario.
A concelleira incidiu en que pequenas intervencións poden contribuír de forma significativa a mellorar a independencia das persoas maiores, favorecendo unha maior seguridade nos desprazamentos e evitando complicacións de saúde derivadas dunha atención insuficiente.
Desde o grupo socialista de Barreiros valoraron esta nova iniciativa como un paso máis na estratexia de reforzo dos Servizos Sociais municipais. Neste sentido, lembraron que nos últimos meses tamén se consolidou o servizo de préstamo de material ortopédico, que facilita ás familias o acceso a camas articuladas, cadeiras de aseo, colchóns antiescaras, grúas de mobilización, andadores, bastóns e outros elementos de apoio.
Coa incorporación deste novo servizo, o Concello pretende seguir ampliando a rede de recursos destinados ás persoas maiores, dependentes e ás familias que precisan apoio, reforzando a atención de proximidade e adaptándose ás necesidades detectadas no municipio.