Barreiros apura o prazo para participar no sorteo de O Gran Camiño
A conta atrás xa está en marcha en Barreiros para participar no sorteo posto en marcha con motivo da chegada de O Gran Camiño 2026 ao municipio. O prazo para entrar no concurso rematará mañá, mércores 15 de abril, ás 13.00 horas, polo que a convocatoria afronta xa as súas últimas horas antes do peche.
A iniciativa busca aproveitar o tirón da proba ciclista, que fará meta en Barreiros na segunda etapa da edición deste ano. O concello converterase así nun dos escenarios da quinta edición de O Gran Camiño, que se celebra entre o 14 e o 18 de abril e que volve reunir a figuras e equipos destacados do calendario internacional.
No sorteo repartiranse dez lotes de agasallos, cinco a través de Facebook e outros cinco en Instagram. En cada rede entregaranse dous maillots oficiais de O Gran Camiño e tres lotes compostos por mochila e gorra oficial. Para participar, as persoas interesadas deben indicar que lles gusta a publicación, etiquetar a dúas persoas nos comentarios e seguir as contas do Concello de Barreiros, da Vicepresidencia da Deputación de Lugo e de O Gran Camiño Cycling.
O anuncio das persoas gañadoras está previsto para o venres 17 de abril, nunha acción promocional coa que o Concello busca implicar á veciñanza e dar ambiente á chegada da carreira. A etapa con final en Barreiros unirá Vilalba e A Mariña nun dos percorridos destacados desta edición.