Avós e netos volverán compartir unha xornada de convivencia no Vicedo

AMariñaXa
A convocatoria está dirixida a persoas xubiladas empadroadas no municipio, aos seus cónxuxes e a netos e netas de entre 3 e 18 anos
encontro-interxeracional-O-Incio-25
20 Nov 2026

O Vicedo volverá reunir distintas xeracións nunha xornada de convivencia coa celebración do XXXII Encontro Interxeracional de Avós-Netos, previsto para o vindeiro 21 de novembro no pavillón municipal. A iniciativa busca fortalecer os vínculos entre as persoas maiores e os máis novos, nunha cita que xa forma parte da memoria colectiva do municipio.

A convocatoria está aberta ás persoas xubiladas empadroadas no Vicedo, así como aos seus cónxuxes, aínda que non teñan esa condición. Tamén poderán participar os seus netos e netas sempre que teñan entre 3 e 18 anos.

Ademais, a organización permite a asistencia de acompañantes que non estean empadroados no municipio. Neste caso, deberán aboar o importe correspondente á comida no momento de formalizar a inscrición.

O encontro alcanza a súa trixésimo segunda edición mantendo o propósito de favorecer o intercambio de experiencias e o achegamento entre avós e netos. Unha celebración que cada ano pon en valor a importancia das relacións familiares e da convivencia entre xeracións.

0.14535188674927