Aspanane transforma en arte os plásticos recollidos na praia de Covas
Aspanane converteu en creación artística varios quilos de plástico que as persoas usuarias da entidade recolleron hai uns meses na praia de Covas. A iniciativa permitiu dar unha nova utilidade aos residuos retirados da area, transformándoos en diferentes pezas artesanais que combinan creatividade e concienciación ambiental.
A asociación compartiu o resultado do traballo a través dun vídeo publicado nas súas redes sociais, no que se poden ver distintas creacións elaboradas con estes materiais. Entre elas figuran representacións de animais mariños, un mapa do mundo e varios abalorios.
O proxecto ten tamén un significado especial para as persoas participantes, xa que foron as mesmas mans que retiraron os anacos de plástico da praia as que, meses despois, os converteron en novos obxectos. Deste xeito, o traballo de limpeza realizado na contorna de Covas tivo continuidade nunha actividade creativa que permitiu aproveitar os residuos recollidos.
A iniciativa enmárcase no proxecto 'Entre Mareas: Respectar, gozar e crear', cofinanciado pola Unión Europea e que conta cunha axuda da Consellería do Mar. O financiamento articúlase a través da Estratexia de Desenvolvemento Local Participativo (EDLP) aprobada polo GALP A Mariña-Ortegal, no marco do Fondo Europeo Marítimo, de Pesca e de Acuicultura 2021-2027.
Con esta experiencia, Aspanane pon o foco na importancia de reducir os residuos e fomentar a reutilización dos materiais, ao tempo que lembra que a protección dos mares e do medio mariño é unha responsabilidade compartida.
