As San Lucas celebrarán 870 anos de historia cunha programación que se estenderá ata o 25 de outubro
Mondoñedo volverá converterse en outubro nun dos grandes puntos de encontro da tradición galega coa celebración das San Lucas, que alcanzan os 870 anos de historia mantendo o seu lugar entre as feiras máis antigas que continúan celebrándose en Europa. A programación estenderase do 16 ao 25 de outubro e combinará o marcado carácter gandeiro da cita con música, espectáculos ecuestres, folclore, actividades infantís e humor.
A esencia da celebración seguirá ligada aos cabalos e á actividade gandeira. "O corazón das San Lucas está na baixada dos cabalos e nos curros da feira, que dependen directamente da continuidade da gandería, especialmente da gandería extensiva —da cría de cabalos no monte—, como actividade produtiva, rendible e con relevo xeracional", destacouse durante a presentación, na que tamén se lembrou a Luciano García, da gandería Xan das Bouzas, falecido o pasado mes de xullo.
Os festexos comezarán o venres 16 co pregón de Luis Rego Valcarce, previsto para as 20.30 horas no Auditorio Municipal Pascual Veiga. A primeira xornada completarase coa verbena de Los Players e New York.
Un dos momentos máis esperados chegará o sábado 17, cando os cabalos volverán tomar Mondoñedo. O tradicional paso pola Praza da Catedral está previsto para as 18.45 horas. A música tamén será protagonista con Suavecito e Marbella e, ás 22.30 horas, Keepers e The Rapants ofrecerán un concerto na Praza do Seminario.
A GRAN FEIRA TRADICIONAL E OS CABALOS, PROTAGONISTAS
O domingo 18 celebrarase a Gran Feira Tradicional, unha das xornadas centrais das San Lucas. A oferta cultural incluirá dous concertos de Abraham Cupeiro, ás 17.00 e ás 19.30 horas na Praza da Catedral, ademais das actuacións de Salsarena, Principal e D'Kriss.
A tradición ecuestre continuará cun espectáculo de doma nocturna a cargo de Kevin Ferreira, Javier Simón e Lola Elías, unha proposta que se repetirá o luns 19. Esa xornada estará dedicada tamén aos máis pequenos co Día do Neno e contará coa música de Costa Dorada e Capitol.
A programación continuará o martes 20 coas actuacións de Trébol e Los Satélites, mentres que o venres 23 chegará unha nova xornada de festa con Los Coleguitas de Venezuela na Praza do Concello. O humor terá tamén o seu espazo co monólogo de David Perdomo, ás 20.30 horas no Auditorio Municipal Pascual Veiga.
LUAR NA LUBRE E XABIER DÍAZ, NA RECTA FINAL
O sábado 24 terá un marcado protagonismo da música e da cultura tradicional. A programación incluirá unha sesión vermú con Zest e, desde as 12.00 horas, xogos tradicionais da man de Xotramu.
Ás 17.00 horas comezará un pasarrúas que dará paso a un encontro folclórico na Praza do Concello coa participación de Os do 21 do Vicedo, A Subela de Foz e Ledicia de Burela.
A noite reservará dous dos grandes concertos desta edición. Xabier Díaz & Adufeiras de Salitre actuarán de balde ás 20.30 horas na Praza da Catedral e, ás 22.30 horas, será a quenda de Luar na Lubre, tamén con entrada gratuíta.
As San Lucas chegarán ao seu remate o domingo 25, cunha sesión vermú protagonizada por Superglú na Praza do Concello.
Mondoñedo afronta así dez días nos que a programación festiva e cultural volverá acompañar unha tradición que leva 870 anos vinculada á cidade, aos cabalos e á feira, conservando a súa esencia gandeira ao tempo que incorpora propostas para públicos de todas as idades.