As persoas usuarias de ASPROMOR levarán o musical 'Alicia no País das Marabillas' ao Teatro Pastor Díaz
O Teatro Pastor Díaz de Viveiro acollerá o vindeiro 28 de novembro, ás 20.00 horas, a representación do musical 'Alicia no País das Marabillas', protagonizado polas persoas usuarias de ASPROMOR e coa colaboración de ASPANANE. A proposta cultural permitirá achegar ao público o traballo desenvolvido pola entidade arredor do teatro inclusivo e da participación das persoas con discapacidade intelectual.
A montaxe forma parte dun proxecto que ASPROMOR recuperou en 2024, coincidindo co seu 40 aniversario. A iniciativa naceu coa intención de abrir novas vías de participación social, favorecer o desenvolvemento persoal e reforzar a autonomía e o protagonismo das persoas participantes a través dunha experiencia artística compartida.
O espectáculo conta cun guión e unha dirección teatral a cargo de Quico Bouza. Os ensaios realízanse diariamente baixo a coordinación de dúas educadoras da asociación e coa colaboración dun amplo equipo no que participan músicos, cantantes, bailarinas e persoas voluntarias. O traballo conxunto de todos eles permite preparar unha representación na que as persoas usuarias son as protagonistas sobre o escenario.
Desde ASPROMOR destacan que o obxectivo vai máis alá de facilitar o acceso á cultura. O proxecto pretende mostrar á sociedade as capacidades, o talento e as posibilidades artísticas das persoas con discapacidade intelectual, contribuíndo a superar visións estereotipadas e a cambiar a percepción social arredor desta realidade.
A chegada ao Teatro Pastor Díaz supón tamén un novo paso na evolución da iniciativa, xa que permite trasladar o traballo realizado a un escenario diferente do habitual e chegar a novos públicos. Deste xeito, o proxecto amplía a súa presenza territorial e reforza a súa dimensión cultural e social.