As Festas do Carmen da Pescadería provocarán cortes de tráfico na Avenida de Cervantes
O Concello de Viveiro informou de que a Avenida de Cervantes sufrirá importantes restricións á circulación de vehículos durante toda esta fin de semana. O corte de tráfico realizarase este sábado 18 e o domingo 19 de xullo co obxectivo de garantir a seguridade e o correcto desenvolvemento das actividades programadas con motivo da celebración das Festas do Carmen da Pescadería na localidade.
Segundo trasladou a administración local, as restricións na circulación aplicaranse en dúas franxas horarias diferenciadas en ambas as dúas xornadas. Deste xeito, os cortes arrancarán ás 12.15 horas e manteranse ata que remate a tradicional sesión vermú, retomándose novamente a partir das 20.30 horas e estendéndose ata a finalización de todas as actividades festivas previstas para a noite.