As carrilanas volverán tomar A Pontenova nunha xornada de velocidade e festa
As carrilanas volverán ser protagonistas na Pontenova o próximo sábado 26 de setembro, nunha xornada na que a competición se combinará cun programa festivo que se prolongará ata a noite. O Descenso de Carrilanas da Pontenova reunirá participantes e público arredor dunha cita marcada pola velocidade e a tradición.
A actividade comezará entre as 9.00 e as 10.00 horas coas verificacións na Praza dos Fornos, paso previo ao inicio da competición. Ás 11.00 horas celebraranse os adestramentos e, unha vez concluídos, disputarase a primeira manga oficial.
Tras esta primeira parte da proba, ás 14.30 horas ofrecerase un pincho aos participantes. A competición retomarase ás 15.30 horas cos remontes para afrontar posteriormente un novo bloque formado por outras dúas mangas oficiais.
A entrega de premios está programada para as 20.00 horas, recoñecendo aos mellores participantes dunha xornada na que as carrilanas volverán converterse nun dos principais atractivos da localidade.
Pero a programación non rematará coa competición. A Praza dos Fornos acollerá tamén unha churrascada para completar o carácter festivo da cita.
A música terá igualmente un papel destacado no peche da celebración, coa actuación de DJ Pedro Bermúdez, que prolongará o ambiente despois dunha intensa xornada de carrilanas.
A cita permitirá así combinar a vertente deportiva destas peculiares máquinas sen motor cunha proposta de convivencia e festa na Pontenova.