Amado Lar inicia un novo curso no Valadouro con clases de música e baile tradicional
A Asociación Cultural Amado Lar O Valadouro prepara o inicio do curso 2026-2027 cunha nova programación destinada a manter viva e transmitir a música e o baile tradicional galegos entre diferentes xeracións. A entidade ofrecerá clases de baile, canto, pandeireta, gaita e percusión para nenos e nenas, mozos e persoas adultas.
As primeiras actividades comezarán o martes 15 de setembro. Raquel Blas impartirá iniciación ao baile e á pandeireta para participantes a partir dos catro anos, de 16.30 a 17.30 horas.
Pedro Brañas estará á fronte de diferentes grupos de baile, pandeireta e canto. As clases para os máis pequenos desenvolveranse de 17.00 a 18.30 horas, mentres que o grupo de medianos terá actividade de 18.30 a 20.00. O baile impartirase de 20.30 a 21.30 horas e, a continuación, de 21.30 a 22.30, será a quenda de pandeireta e canto para adultos.
A programación de gaita e percusión arrancará o sábado 3 de outubro, con Javier Bossa como profesor. As clases desenvolveranse entre as 18.30 e as 21.30 horas, aínda que a distribución dos grupos concretarase segundo os niveis e as posibles novas incorporacións.
Amado Lar mantén aberta a entrada de novo alumnado, que deberá contactar previamente con algún dos integrantes da directiva. Con esta nova tempada, a asociación continúa apostando pola aprendizaxe e transmisión da cultura tradicional galega no Valadouro.