Alfoz celebrará os días 17 e 18 de xullo o XXVI Mercado Medieval de Castrodouro
O municipio de Alfoz acollerá os días venres 17 e sábado 18 de xullo a XXVI edición do Mercado Medieval de Castrodouro, unha das citas máis emblemáticas do verán na comarca e que cada ano transforma a contorna da Torre Fortaleza nun espazo ambientado na época do Mariscal Pardo de Cela.
Durante dúas xornadas, veciñanza e visitantes poderán mergullarse nun ambiente histórico que recrea costumes, oficios e tradicións medievais, ofrecendo unha experiencia que combina patrimonio, lecer e divulgación cultural nun marco considerado único.
A celebración desenvolverase arredor da Torre Fortaleza do Mariscal Pedro Pardo de Cela, un enclave que se converte no centro da actividade e que reforza o atractivo turístico e histórico desta proposta, xa consolidada no calendario festivo da zona.
O Concello de Alfoz anima a todas aquelas persoas interesadas en participar a achegarse co seu propio posto ao mercado. Para iso, poden contactar co consistorio no teléfono 982 558 001, co obxectivo de organizar a presenza de artesáns e vendedores durante o evento.
O Mercado Medieval de Castrodouro propón así unha viaxe ao pasado, recuperando a figura e a lenda do Mariscal Pardo de Cela e convertendo o recinto nun espazo no que historia e tradición se dan a man nunha contorna singular.