Alfoz acollerá a II Andaina e Xantar Popular do Trece o 16 de maio
O lugar do Trece, na parroquia de Carballido, en Alfoz, converterase o vindeiro sábado 16 de maio nun punto de encontro para veciñanza e visitantes coa celebración da II Andaina e Xantar Popular do Trece. A iniciativa está promovida pola Asociación de Veciños San Sebastián de Carballido coa colaboración do Concello de Alfoz, e pretende ofrecer unha xornada completa na que se mesturen deporte, convivencia e tradición.
A programación dará comezo ás 10:30 horas coa saída da andaina, un percorrido de dificultade baixa que terá como punto de inicio e remate o propio lugar do Trece. Esta actividade está pensada para todos os públicos, permitindo gozar da contorna natural da zona nun ambiente distendido e participativo.
Unha vez finalizada a ruta, a festa continuará coa sesión vermú, prevista para as 14:00 horas, que estará amenizada pola música de Carrete Mix. A continuación, ás 15:00 horas, celebrarase o xantar popular nun recinto cuberto con carpa, no que os asistentes poderán degustar un menú composto por entrantes, lacón de porco celta asado en forno de leña, sobremesa, café e chupito, incluíndo tamén pan, viño e auga.
A programación prolongarase pola tarde cunha sesión de lecer que comezará ás 16:30 horas, novamente coa música de Carrete Mix, á que se sumará unha proposta de karaoke aberta á participación de todas as persoas asistentes. A xornada culminará cun fin de festa animado por un DJ.
Os prezos do xantar serán de 20 euros para maiores de 10 anos, 10 euros para nenos e nenas de entre 5 e 9 anos, mentres que os menores de 4 anos poderán asistir de balde. A organización lembra que é imprescindible adquirir o ticket con antelación para poder participar no xantar, podendo facelo a través de membros da directiva da asociación.
Ademais, sinalan que non é necesario participar na andaina para asistir ao xantar, facilitando así a asistencia de todas aquelas persoas que desexen sumarse unicamente á parte gastronómica e festiva. O aforo será limitado e o prazo para retirar os tickets rematará o 11 de maio.