ACIAL Lourenzá: “Os rapaces preparan dúas carrozas espectaculares, animan e fan rir”
Por Ana Somoza López.
Javier é o presidente da Asociación de Comerciantes de Lourenzá.
Canto tempo levan organizado o Entroido?
Pois xa van bastantes anos á fronte do Domingo de Piñata, que é a insignia laurentina, e ademais desta festa organizamos outras actividades durante todo o ano.
Como se fai fronte economicamente a esta festa?
Pois para poder realizala durante todo o ano facemos outras actividades como son a venda de lotaría de Nadal e Reis, karaokes, bingos, unha cea polo San Xoán, etc. E por suposto contamos cunha achega por parte do Concello para os premios do desfile.
Que é o máis importante do Entroido en Lourenzá?
Pois para nós o evento máis importante e tradicional é o Domingo de Piñata, que é un desfile multitudinario e con participación de comparsas de toda a Mariña, unhas 10, o que fai que a vila se encha de xente.
Isto supón un revulsivo económico.
Si claro. Ademais ao ser un dos últimos Entroidos e os grandes premios que se reparten sempre atrae moitísima xente polo que a hostalaría laurentina está moi contenta.
Hai moitos premios?
Pois adoitamos repartir arredor de 5.500 e 6.000 euros en premio.
En que consiste o Domingo de Piñata?
É un desfile que sae do recinto feiral e percorre todas as rúas de Lourenzá, e este ano será o domingo 26 de febreiro.
Como se participa?
Normalmente a xente inscríbese durante toda a mañá do propio domingo ou previa chamada ou mensaxe, e sempre antes das 15.00 horas. Durante todo o día hai postos de comida e bebida no recinto feiral para animar á xente e ila poñendo en situación. Adoita haber unha media de entre 100 e 120 persoas para as comidas.
E o desfile?
O desfile comezará ás 16.30 horas e remata sobre ás 19.30 máis ou menos, e unha vez que finalice sempre hai unha orquestra para que a xente baile e desfrute dos petiscos mentres se fai a espera ata a entrega de premios.
Algunha lembranza especial?
Por suposto. Todos os anos hai dous grupos de rapaces de veteranos e mozos que preparan dúas carrozas e que son espectaculares, pola súa realización e polo seu humor. Ademais saen de últimos e a xente está esperando a que cheguen porque sempre fan un espectáculo digno de ver. Cada ano fan unha historia diferente e animan e fan rir a todos.
Pódese consultar o resto de entrevistas de Entroido:
Comparsa Sin Xeito: “O noso obxectivo é desfrutar moitos anos máis da mellor festa de todas"
Uxía, raiña do Entroido de Foz: “É un privilexio e unha responsabilidade”
ACD As Minas: “A nosa festa caracterízase por contar cun ambiente moi familiar“
O Mellor de cada casa: “O deseño xa está pensado dende o verán”
Comisión de Festas do Vicedo: “Lanzaremos foguetes para marcar o comezo”
ACIAL Lourenzá: “Os rapaces preparan dúas carrozas espectaculares, animan e fan rir”
O Picato: “Contaremos con 3.000 euros en premios”
