Aberto o prazo de inscrición para a Escola de Surf en Barreiros
O Concello de Barreiros anunciou a apertura do prazo de inscrición para a Escola de Surf, unha das actividades das Escolas Deportivas Municipais, que terá lugar na Praia de Coto desde o 2 de abril ata o 26 de xuño.
A iniciativa está dirixida a nenos e nenas de entre 8 e 16 anos e ofrecerá clases os mércores e/ou os xoves en horario de 17:00 a 18:30 horas. O curso será impartido por monitores titulados e incluirá material para a práctica do surf, ademais dunha camiseta oficial, bolsa e unha excursión de fin de tempada.
As tarifas para a actividade serán de 30 euros ao mes para aqueles que asistan un día á semana e de 45 euros ao mes para os que opten por dous días. Ademais, será necesario aboar unha matrícula única de 15 euros.
A inscrición permanecerá aberta desde o luns 3 de marzo ata cubrir prazas e poderá realizarse a través da sede electrónica municipal ou presencialmente nas oficinas do Concello. As follas de inscrición estarán dispoñibles na web municipal e deberán entregarse acompañadas do xustificante de pago da matrícula.