Aba Taano ofrecerá tres concertos solidarios en Burela, Ribadeo e Ferrol a favor da infancia de Uganda
O grupo Aba Taano protagonizará unha xira solidaria por Galicia os días 21, 22 e 23 de agosto cunha serie de concertos a beneficio da ONG Música para Salvar Vidas de Uganda, un proxecto que apoia a nenos e nenas en situación de vulnerabilidade a través da música e da educación.
A primeira actuación terá lugar o venres 21 de agosto, ás 20.00 horas, no Auditorio de Burela. O concerto continuará o sábado 22, ás 21.00 horas, na igrexa de Ribadeo, situada no parque da rúa San Francisco. A xira rematará o domingo 23 de agosto, tamén ás 20.00 horas, na Concatedral de San Xiao de Ferrol.
As entradas teñen un prezo de 12 euros para o público xeral e de 6 euros para os menores de 12 anos.
Os billetes poden adquirirse a través da plataforma Giglon, así como nos distintos puntos de venda habilitados para cada concerto. En Ribadeo estarán dispoñibles de forma anticipada en Ferrado Marelo, na avenida de Galicia número 3, e en Calzados Delmiro. En Burela tamén se poderán mercar no estanco do porto. Ademais, nos tres concertos haberá venda de entradas unha hora antes do comezo das actuacións, sempre que queden localidades dispoñibles.