A Xunta impulsa o desenvolvemento de 300 vivendas en Ribadeo coa licitación do proxecto urbanístico
A Xunta de Galicia deu un novo paso no desenvolvemento do Plan Vive en Ribadeo coa saída a licitación da redacción do Proxecto de Interese Autonómico (PIA) destinado á construción de 300 vivendas no municipio. O contrato, publicado este martes, conta cun orzamento próximo aos 250.000 euros e permitirá avanzar na transformación urbanística do ámbito coñecido como Sud-R2.
O alcalde de Ribadeo, Dani Vega, destacou que esta actuación permitirá desenvolver unha superficie de arredor de 7,6 hectáreas situada nun punto estratéxico da vila, concretamente na contorna da Avenida Ría de Ribadeo e da conexión coa estrada Nacional 642, na zona oeste do municipio.
Segundo explicou o rexedor, a redacción do proxecto será clave para iniciar os procesos de expropiación, reparcelación e urbanización do solo, co obxectivo de habilitar un novo espazo residencial destinado principalmente á vivenda protexida. O plan contempla que arredor do 80 % das futuras vivendas teñan carácter público.
O prazo establecido para os adxudicatarios será de tres meses para presentar o borrador inicial do PIA, documento necesario para iniciar posteriormente a tramitación ambiental e administrativa do desenvolvemento urbanístico.
Dani Vega subliñou que esta iniciativa busca dar resposta á crecente demanda de vivenda existente no municipio e favorecer ao mesmo tempo un crecemento ordenado da vila. O alcalde insistiu en que o proxecto non pretende unha expansión descontrolada, senón unha planificación urbanística regulada e integrada na estrutura urbana de Ribadeo.
O rexedor tamén puxo en valor a colaboración entre Concello e Xunta de Galicia para impulsar unha actuación que considera estratéxica para o futuro do municipio. Segundo indicou, o desenvolvemento destas 300 vivendas podería supoñer un importante incremento poboacional e converterse nun elemento clave para atraer novos residentes e facilitar o acceso á vivenda.
Desde o goberno local lembran que Ribadeo é un dos poucos concellos galegos de arredor de 10.000 habitantes que presentou unha proposta destas dimensións en materia residencial, coa intención de ofrecer solucións reais ao problema da vivenda e consolidar unha estratexia de crecemento sostible para os próximos anos.