A Xunqueira Fest estrearase o 1 de agosto cunha aposta pola música electrónica e o talento galego
A asociación Os da Xunqueira prepara para o vindeiro 1 de agosto a celebración da primeira edición da Xunqueira Fest, unha cita que nace coa intención de converterse nun novo punto de encontro para a veciñanza e para os amantes da música electrónica. O festival terá carácter gratuíto e ofrecerá unha programación centrada neste estilo musical, complementada con diferentes propostas de lecer ao longo da xornada.
A organización confirmou a participación de catro artistas. O cartel estará integrado por dous DJs da zona, DJ Juanjo e DJ Kanike, aos que se sumarán Muiños e Zero Delay.
Ademais da música, o recinto contará con servizo de bebidas e unha oferta gastronómica pensada para que os asistentes poidan desfrutar dunha xornada completa de convivencia e diversión. A celebración servirá tamén para presentar algunhas novidades relacionadas coas próximas festas, xa que está previsto realizar un adianto do cartel festivo deste ano.
Outro dos atractivos da cita será a posta á venda das camisetas da asociación, que poderán adquirirse por 15 euros. A organización tamén estuda a realización de sorteos mediante rifas para dinamizar a participación do público.
En canto á programación da fin de semana, os responsables do evento non descartan ampliar as actividades ao domingo 2 de agosto. Entre as posibilidades que se barallan figura a organización dunha churrascada popular acompañada dunha sesión vermú musical, aínda que esta proposta continúa pendente de confirmación.
Con esta iniciativa, Os da Xunqueira buscan impulsar unha nova actividade festiva e cultural que combine música, gastronomía e ambiente de convivencia, reforzando a programación estival da contorna.