A voz dos alcaldes: Rocío López García, alcaldesa de Lourenzá
Como se iniciou na política e como se vinculou ao seu partido?
Sempre tiven curiosidade pola política, aínda que non me imaxinaba implicada tan a fondo. Hai anos propuxéronme formar parte dunha lista municipal e aceptei sen dubidalo. En canto ao partido, sempre me identifiquei co Partido Socialista; comparto os seus valores dende moi nova
Como deu o salto para ser alcaldesa?
O apoio da miña agrupación foi decisivo. No 2011 encabecei por primeira vez a candidatura en Lourenzá, obtendo catro concelleiros. En 2015 acadamos a maioría absoluta e cheguei á Alcaldía. Estou moi agradecida aos meus compañeiros e á miña familia polo respaldo constante. É fundamental non esquecer nunca de onde vés.
A nivel persoal, que sacrificios supón formar parte do Goberno?
A política local esixe moita dedicación. Tes menos tempo para a familia e para ti mesma, porque o servizo público implica dispoñibilidade practicamente permanente. Hai numerosos compromisos e responsabilidades. Aínda así, co paso do tempo aprendes a organizarte e a compatibilizar vida privada e función pública.
E beneficios?
O máis gratificante é poder traballar polos teus veciños e participar en decisións que melloran o seu día a día. A política local permite un contacto directo coa xente e iso é moi enriquecedor. Ademais, coñeces persoas, ámbitos distintos e aprendes continuamente.
Cales son os seus obxectivos a nivel político?
Sempre defendín que a política máis auténtica é a municipal, porque estás en contacto directo coa cidadanía. É onde máis cómoda me sinto. Nas grandes esferas ás veces pérdese esa proximidade e esa liberdade para defender o que realmente pensas.
E de cara á próxima lexislatura?
O principal reto é impulsar a construción dunha Residencia da Terceira Idade. En Lourenzá, como en moitos concellos galegos, a poboación maior medra e é importante ofrecer a posibilidade de envellecer no propio municipio, preto da familia. Tamén queremos avanzar na restauración do Mosteiro de San Salvador para darlle usos acordes ás necesidades actuais.
Está a favor dos pactos para conformar un Goberno estable?
A maioría absoluta facilita a gobernabilidade, pero non estou en contra dos pactos. Son unha persoa dialogante e creo no consenso. Falando e escoitando pódense alcanzar acordos positivos. Ninguén ten a verdade absoluta e a suma de distintas visións pode enriquecer os proxectos.
Cales son as principais liñas do seu programa?
O noso programa aposta pola mellora de infraestruturas, estradas e locais municipais, así como pola ampliación do saneamento e do alumeado a máis barrios. Impulsaremos unha Residencia de Maiores, a rehabilitación do Mosteiro de San Salvador e reforzaremos as programacións culturais e deportivas. Ademais, promoveremos o Camiño Norte como motor turístico e económico para Lourenzá.
Cales considera que son as principais necesidades no seu concello?
A Residencia de Maiores é prioritaria, pero tamén o é ampliar o saneamento e garantir alumeado público en todos os núcleos. Outra actuación necesaria sería completar a mellora das instalacións deportivas de Santa Cruz coa construción de gradas.
De que proxectos se sente máis orgullosa?
Da mellora da rede viaria en todas as parroquias e da creación do local multiúsos de Ponte de Cuñas, que hoxe acolle numerosas actividades. Tamén da renovación dos parques públicos no Cantón, na Gracia e en Santo Tomé, da construción do campo de herba artificial de Santa Cruz e da Área de Autocaravanas do Ranchito.
Como é a súa relación coa oposición?
Boa. Podemos discrepar politicamente, pero iso non debe afectar ao respecto persoal. Todos somos veciños e debemos antepoñer o ben común. Non me gusta a confrontación baseada na descalificación; creo nunha política de respecto e diálogo.
EN CLAVE PERSOAL
- Idade, estado civil e familiar
42 anos, solteira con parella e un fillo de 11 meses. - Profesión e formación
Licenciada en Administración e Dirección de Empresas. - E se non foras alcaldesa que che gustaría ser?
Xornalista. - Que quería ser de maior?
Cantante e música. - Que fas para desconectar?
Estar na miña casa en San Adriano, co meu neno e meus pais. Tamén tomar un café coas amigas. - Unha virtude e un defecto.
Como virtude diría que o meu carácter sociable e extravertido, e defecto, son demasiado sincera moitas veces. - Un consello para compartir.
Non discutir nunca aínda que o que che digan non che guste. Intenta empatizar coa outra persoa. - Un libro.
Cantares Gallegos de Rosalía. - Unha película.
O que arde de Oliver Laxe. - Un grupo de música.
Son máis de orquestras. Sempre me gustaron moito Os Satélites. - Unha afección.
A patinaxe. - Un lugar que visitar.
Gustaríame ir a Marrocos, concretamente a Marrakech e Casablanca. - Unha comida e unha bebida.
Un arroz caldoso. E de beber auga, pois non son de bebidas gasosas e menos de alcohol. - Unha personaxe admirada.
Rosalía de Castro. - Unha posesión prezada.
Unha cadea que foi da miña aboa e que gardo como o maior tesouro que teño. - Un desexo.
Que rematen as guerras. Non soporto ver esas imaxes na televisión. - Algo para esquecer.
Os momentos duros vividos na pandemia e a incerteza daqueles primeiros meses. - Que é o que máis valora nunha persoa?
A sinceridade, a lealdade e autenticidade. - Como equilibras a vida pública e a privada?
Intento facer un equilibrio entre as dúas. Cando participo nas actividades e eventos do Concello gústame facelo como alcaldesa e como veciña. - Usas redes sociais e Whatsapp?
Si, hoxe en día é fundamental. - Un desafío pendente.
Chegar a escribir un libro. - Onde te ves en cinco anos?
Pois gustaríame verme aquí, sendo a alcaldesa de Lourenzá.