A UNED de Foz presenta unha programación de maio centrada na formación práctica e o compromiso social
A Aula Universitaria da UNED en Foz vén de dar a coñecer a súa proposta de extensión universitaria para o mes de maio de 2026, unha programación que inclúe cinco iniciativas orientadas a combinar coñecemento especializado, divulgación e sensibilización social e ambiental.
O calendario inclúe tres cursos formativos que abordan temáticas de utilidade práctica. Entre eles figura a terceira edición do curso de primeiros auxilios pediátricos, que se desenvolverá entre o 6 e o 21 de maio en sesións de tarde, os mércores de 17:00 a 20:00 horas. A formación será impartida por Camilo Vázquez, profesional da enfermaría con ampla traxectoria na docencia sanitaria na comarca.
A oferta complétase cun curso centrado no Estatuto de Autonomía, dirixido especialmente a persoas que preparan oposicións, que terá lugar entre o 18 e o 21 de maio en horario de 16:00 a 20:00 horas. Nesas mesmas datas e coincidindo en horario desenvolverase tamén unha proposta formativa sobre mediación e conciliación no ámbito deportivo, que abordará esta práctica desde unha perspectiva ética, inclusiva e educativa.
Xunto á formación teórica, a programación incorpora unha actividade xa consolidada na Aula Universitaria: o roteiro interpretativo Flores de primavera. Esta ruta terá lugar o 20 de maio, entre as 16:00 e as 18:30 horas, con saída desde o Campo da Feira da Espiñeira, en Vilaronte. A iniciativa estará guiada por Pedro Rolle, quen acompañará ás persoas participantes nun percorrido centrado no coñecemento da flora propia desta época do ano.
Ademais, o programa inclúe unha charla-obradoiro dedicada á comunicación de malas noticias en contextos de intervención das forzas de seguridade e dos servizos de emerxencias. Esta actividade desenvolverase o 21 de maio, de 17:00 a 20:00 horas, e contará coa participación da psicóloga Alicia Lage. A proposta, organizada en colaboración coa AUGC, pretende ofrecer ferramentas para afrontar situacións de alta carga emocional desde unha perspectiva profesional e humana.
A concelleira responsable da Aula Universitaria e da área de Educación, Elena Martínez Pena, subliñou que esta programación responde á vontade de ampliar a formación máis alá do ensino regrado. Segundo indicou, o obxectivo é facilitar coñecementos útiles para o día a día e contribuír á construción dunha cidadanía máis preparada.
Pola súa banda, a coordinadora da Aula, Marta Muiña Rodríguez, destacou a continuidade de propostas vinculadas ao medio natural, como os roteiros interpretativos, xunto a outras iniciativas centradas no ámbito social e emocional, como a comunicación en situacións complexas.
Todas as actividades poderán seguirse tanto de maneira presencial nas instalacións da UNED en Foz como a través de modalidade en liña. As persoas interesadas poderán formalizar a súa inscrición mediante a páxina web da UNED, de forma presencial na propia Aula Universitaria, a través dos teléfonos habilitados ou por correo electrónico.
Desde a Aula Universitaria da UNED en Foz animan á veciñanza a participar nesta programación, coa que reforzan o seu compromiso coa formación continua e accesible na Mariña Lucense.