A Sociedade Cultural Ledicia celebra o seu festival de fin de curso con baile e música tradicional
A Sociedade Cultural Ledicia celebra este domingo 28 de xuño en Burela o seu Festival de Baile e Música Tradicional, unha cita xa habitual no calendario da entidade e que nesta ocasión servirá como broche final ao curso 25/26.
O evento desenvolverase na Praza do Concello e dará comezo ás 19:30 horas, nunha xornada pensada para poñer en valor o traballo realizado ao longo de todo o ano nas distintas áreas da escola. Sobre o escenario estarán representadas todas as seccións, que ofrecerán unha mostra conxunta do aprendido durante o curso, nun formato que combina exhibición e celebración do fin de etapa.
A actuación permitirá ao público asistente coñecer de primeira man o progreso do alumnado, así como o labor continuado que se realiza dentro da entidade cultural ao longo do ano, nunha proposta que busca tamén poñer en valor e manter viva a tradición do baile e da música popular.