A rúa Reinante de Ribadeo reabre tras unha renovación integral en tempo récord
A rúa Reinante de Ribadeo xa volve estar aberta ao tránsito peonil tras a finalización das obras de mellora, que lle devolven unha imaxe renovada e unhas condicións máis seguras para a veciñanza.
Os traballos, que comezaron hai dous meses, remataron antes do prazo inicialmente establecido, fixado en catro meses. Cun investimento total de 90.000 euros, a intervención centrouse na substitución da laxa, que presentaba un estado moi deteriorado, así como na mellora doutros elementos fundamentais da infraestrutura urbana.
Ademais da renovación do pavimento, leváronse a cabo actuacións no sistema de alumeado público e na recollida de augas pluviais e residuos, co obxectivo de optimizar o funcionamento destes servizos e previr problemas futuros.
Desde o equipo de goberno do Concello de Ribadeo destacaron a rapidez coa que se executaron os traballos e agradeceron a paciencia da cidadanía durante o tempo que duraron as obras. “Sabemos que actuacións deste tipo sempre ocasionan molestias, polo que queremos pedir desculpas e agradecer a comprensión da veciñanza, así como poñer en valor a celeridade coa que se completaron os traballos”, sinalaron.
A empresa encargada da intervención dedicou a xornada á limpeza da rúa, un paso previo á súa reapertura definitiva ao uso peonil. Con esta actuación, o Concello continúa avanzando na mellora dos espazos públicos, apostando por infraestruturas máis modernas, funcionais e adaptadas ás necesidades actuais.