A Romaxe do Bo Xantar de Naseiro volverá reunir tradición, gastronomía e música do 21 ao 26 de agosto
A Romaxe do Bo Xantar de Naseiro celebrará unha nova edición entre os días 21 e 26 de agosto, convertendo un ano máis este recuncho de Viveiro nun dos grandes puntos de encontro festivos do verán galego. Declarada Festa de Interese Turístico de Galicia, a cita combinará gastronomía, tradición relixiosa e unha ampla programación musical pensada para públicos de todas as idades.
A apertura da romaría terá lugar o venres 21 de agosto coa celebración do tradicional Día do Polbo, unha das xornadas máis concorridas da festa, que estará acompañada pola actuación da batucada Kombarullo.
O sábado 22 de agosto, a programación incluirá, a partir das 13.30 horas, a misa na capela do campo da festa e a posterior procesión. Pola tarde e pola noite, a música correrá a cargo da orquestra Platinum e do grupo Pasión, que protagonizarán a sesión vermú e a verbena.
Os actos relixiosos continuarán o domingo 23, tamén desde as 13.30 horas, cunha misa cantada pola Coral Alborada e a procesión. A xornada completarase coa actuación da orquestra La Ocaband e do grupo M3 Show.
A programación musical seguirá o luns 24 de agosto, cando a sesión vermú e a verbena estarán amenizadas pola orquestra Fuego e o grupo Arizona. Un día despois, o martes 25, será a quenda do Dúo Belinda e do grupo H3RMO, que porán ritmo á penúltima xornada da romaría.
A clausura chegará o mércores 26 de agosto coa celebración do Día do Neno, no que as atraccións do campo da festa ofrecerán prezos populares para facilitar a participación das familias.