A renovación do local social de San Xusto de Cabarcos mellora o confort para a actividade veciñal
O local social de San Xusto de Cabarcos, no concello de Barreiros, vén de ser obxecto dunha actuación de mellora que permitiu optimizar as condicións do inmoble e adaptalo mellor ao uso diario da veciñanza. A intervención realizouse grazas á colaboración entre a Xunta de Galicia e a asociación de veciños San Pastor, responsable da xestión do espazo.
Os traballos centráronse na renovación do solo do edificio, que ata agora era de cemento, mediante a colocación dun pavimento vinílico. Esta mellora supón un avance notable en termos de illamento e confort térmico, ademais de ofrecer unha superficie máis axeitada para o desenvolvemento das actividades que se organizan de maneira habitual no local.
O delegado territorial da Xunta en Lugo, Javier Arias, visitou as instalacións para coñecer o resultado da actuación, que contou cun financiamento autonómico de 11.500 euros a través da orde de axudas dirixida ás comunidades veciñais. Segundo se puxo de manifesto durante a visita, a nova pavimentación permite un uso máis cómodo e seguro do espazo, especialmente nas clases de ximnasia de mantemento, nas que os participantes realizan exercicios sobre esterillas directamente no chan.
A mellora do local supón tamén un impulso para a actividade social e cultural da parroquia. A asociación veciñal San Pastor, en funcionamento dende o ano 2001, desenvolve ao longo do ano un amplo programa de propostas que inclúe encontros de convivencia, celebracións, excursións e iniciativas orientadas ás persoas maiores, como ximnasia ou talleres de memoria, todas elas beneficiadas agora polas novas condicións do inmoble.
Desde a Xunta sublíñase que este tipo de actuacións contribúen a manter en bo estado os locais sociais, considerados espazos clave para a vida comunitaria, especialmente no ámbito rural. No caso da Mariña, varias asociacións veciñais de distintos concellos recibiron apoio económico na convocatoria de 2025 para executar melloras similares nos seus locais.