A rehabilitación da estrada do Cadramón avanza cun investimento de máis de 256.000 euros
O PSdeG do Valadouro valorou de maneira positiva a aprobación, por parte da Xunta de Goberno da Deputación de Lugo, da licitación das obras de acondicionamento da estrada provincial LU-P-6305, unha vía que enlaza O Campo co reemisor de RTVE situado na parroquia do Cadramón e que será obxecto dunha renovación integral nos próximos meses.
A actuación contará cun investimento de 256.862,35 euros e permitirá actuar ao longo de preto de seis quilómetros da estrada. Os traballos previstos inclúen a reapertura das cunetas, a reparación das zonas deterioradas, a renovación do pavimento e a substitución da sinalización vertical, co obxectivo de mellorar tanto a seguridade como as condicións de circulación nesta infraestrutura provincial. O prazo estimado para a execución das obras será de catro meses.
A portavoz socialista no municipio, María Xosé Barreira, lembrou que esta intervención figuraba entre as principais demandas trasladadas á presidenta da Deputación de Lugo durante un encontro no que se analizaron as necesidades da rede viaria provincial ao seu paso polo Valadouro.
Segundo sinalou, a licitación deste proxecto supón unha resposta a unha petición considerada prioritaria para o concello e pon de manifesto a vontade da institución provincial de seguir investindo na conservación das estradas que comunican os distintos núcleos do municipio.
Desde o PSdeG destacan ademais que a Deputación tamén manifestou o seu compromiso para actuar no derrubamento rexistrado nesta mesma vía como consecuencia dos últimos temporais, así como para continuar impulsando actuacións noutros puntos que presentan necesidades de mellora.
Os socialistas aseguraron que seguirán mantendo contacto coas distintas administracións para trasladar novas propostas que permitan avanzar na modernización das infraestruturas locais e responder ás demandas da veciñanza, especialmente nas zonas rurais, onde consideran esencial garantir unhas comunicacións seguras e en boas condicións.