A reforma da Praza de Abastos de Viveiro queda sen apoio da Deputación e abre un novo conflito institucional
A reforma da Praza de Abastos de Viveiro sumou un novo atranco tras a negativa da Deputación de Lugo a colaborar no seu financiamento. O Goberno local expresou este mércores o seu malestar despois da reunión mantida co vicepresidente provincial, Efrén Castro, na que, segundo o Concello, se confirmou que a institución non achegará fondos para unha actuación que o executivo considera clave para a dinamización económica e social da vila.
O proxecto conta xa cunha subvención da Xunta de Galicia de 320.000 euros, repartida en dúas anualidades de 160.000 euros en 2026 e 2027. A actuación ten un orzamento estimado de 768.068,68 euros, polo que o Concello leva tempo intentando completar o investimento necesario a través doutras administracións.
Desde Viveiro sosteñen que, durante este proceso, foron cumprindo as condicións que se lles trasladaron desde a Deputación. Entre elas, priorizar investimentos, presentar os proxectos técnicos requiridos, buscar a implicación doutras institucións e mesmo agardar á posible dispoñibilidade de remanentes. Con todo, esas xestións non se traduciron, polo momento, en ningún compromiso económico do organismo provincial.
O executivo local defende que a rehabilitación da Praza de Abastos vai máis alá dunha simple obra de mellora. Trátase dun inmoble de 1925, proxectado polo arquitecto Ricardo García Puig, considerado un dos mercados de abastos máis antigos e singulares de Galicia pola súa tipoloxía vencellada ao peixe. Para o Concello, a intervención serviría non só para conservar un espazo patrimonial emblemático, senón tamén para reforzar a actividade comercial no centro histórico.
O Goberno municipal asegura ademais que esta falta de apoio non é un caso illado e denuncia que tamén foron rexeitadas outras peticións vinculadas a proxectos deportivos e culturais do municipio. A pesar deste escenario, o Concello insiste en que seguirá buscando novas vías de financiamento para sacar adiante tanto a reforma da Praza de Abastos como outras actuacións que considera estratéxicas para o futuro de Viveiro.