A praia dos Bloques acolle unha nova programación de actividades acuáticas para a mocidade
A praia dos Bloques continúa estes días converténdose nun dos principais escenarios das actividades de verán promovidas polo Concello de Ribadeo. A Concellería de Deportes e Mocidade mantén en marcha unha programación pensada para ofrecer alternativas de ocio activo á rapazada durante as vacacións, coa práctica de diferentes disciplinas acuáticas.
Tras a xornada celebrada este mércores, na que os participantes puideron iniciarse no kaiak entre as 16.00 e as 19.30 horas, a programación continuará este xoves coa práctica de paddle surf no mesmo horario.
As propostas deportivas prolongaranse tamén durante a primeira semana de agosto. O día 4 será a quenda dos deslizadores acuáticos, dispoñibles de 16.00 a 19.30 horas, mentres que os días 5, 6 e 7 de agosto esta actividade desenvolverase en sesións de mañá, de 11.30 a 14.00 horas, e tamén pola tarde, entre as 16.00 e as 19.30 horas.
O concelleiro de Deportes, Francisco José Silvent, animou á mocidade a participar nesta programación estival, lembrando que estas iniciativas dan continuidade ás actividades desenvolvidas durante o mes de xullo na pista multideporte e buscan ofrecer opcións adaptadas a diferentes intereses.
O edil destacou que o obxectivo é que os mozos e mozas aproveiten o verán para practicar exercicio físico, compartir tempo ao aire libre e establecer novas relacións de amizade, combinando diversión e hábitos de vida saudables nun entorno privilexiado como a praia dos Bloques.