A Pontenova, Trabada e O Vicedo, entre os concellos beneficiarios das axudas para reforzar a prevención de incendios
A Pontenova, Trabada e O Vicedo figuran entre os doce concellos da provincia de Lugo beneficiarios da nova convocatoria de axudas para a adquisición de vehículos, adaptacións e maquinaria destinada a reforzar os traballos de prevención de incendios forestais. En conxunto, os municipios lucenses recibirán máis de 265.200 euros.
A convocatoria está dirixida a concellos de ata 30.000 habitantes e busca facilitar que dispoñan dos medios necesarios para realizar labores de limpeza e desbroce en espazos e zonas verdes, marxes das estradas, contornas dos núcleos de poboación e espazos naturais. Estas actuacións forman parte das medidas destinadas a reducir o risco de propagación dos incendios forestais.
As subvencións poden alcanzar os 30.000 euros e permiten financiar tanto a compra de vehículos como as adaptacións necesarias para empregalos en tarefas de mantemento e limpeza preventiva nas proximidades das vías e camiños municipais.
As axudas tamén poden destinarse á adquisición de maquinaria forestal lixeira eléctrica ou de vehículos complementarios para os traballos preventivos. Entre o equipamento susceptible de financiamento atópanse miniescavadoras, compactadoras e rolos, pequenos tractores, rozadoras, remolques, trituradoras, vehículos todoterreo ou minicamións.
Máis dun millón de euros para 53 concellos galegos
A convocatoria conta cun investimento superior ao millón de euros e está cofinanciada nun 60 % pola Unión Europea a través do Programa Galicia Feder 2021-2027. En total resultaron beneficiarios 53 concellos galegos: 23 de Ourense, doce de Lugo, nove da Coruña e outros nove de Pontevedra.
Ourense concentra a maior contía, con máis de 479.000 euros distribuídos entre os seus 23 municipios beneficiarios. A continuación sitúase Lugo, con máis de 265.200 euros, mentres que os nove concellos da Coruña recibirán máis de 170.600 euros e os nove de Pontevedra sumarán máis de 164.800 euros.
O Goberno autonómico enmarca esta convocatoria nas diferentes liñas de financiamento destinadas ás administracións locais para mellorar equipamentos, infraestruturas e servizos municipais.
Entre estes instrumentos atópanse tamén o Fondo de Compensación Ambiental, dotado con máis de 11,4 millóns de euros; unha liña de 3,5 millóns para crear e mellorar infraestruturas, instalacións e equipamentos relacionados cos servizos municipais; e 10 millóns do Fondo de Cooperación Local destinados a proxectos de carácter estratéxico.
O Fondo de Cooperación Local alcanza, pola súa banda, os 187 millóns de euros, un 12 % máis que en 2025. Segundo os datos autonómicos, as distintas liñas de apoio permitiron financiar preto dun milleiro de proxectos municipais durante o pasado ano.