A Pontenova reunirá anticuarios, artesáns e vehículos clásicos na súa feira de decembro
A Pontenova celebrará os días 4, 5 e 6 de decembro a XIX Feira de Antigüidades e Artesanía, que volverá coincidir coa X Xuntanza de Vespas, Motos e Coches Clásicos. A cita reunirá anticuarios, artesáns e produtores nunha fin de semana que combina comercio tradicional, demostracións de oficios e afección polo motor.
A Praza dos Fornos será o escenario principal do encontro, que contará con arredor de 28 anticuarios e unha vintena de expositores na zona de alimentación. A entrada será gratuíta e o horario de apertura irá de 11.00 a 14.00 e de 16.00 a 21.00 horas, agás o domingo, cando pechará ás 20.00.
O programa incluirá demostracións de forxa de ferro, pintura, cestaría de vimbio, coiro, torno de madeira, xoiería e elaboración de lámpadas de cabaza. Ademais, haberá unha exposición de pezas de tornearía tradicional, que permitirá achegar ao público técnicas artesanais vinculadas aos antigos traballos coa madeira.
A programación completarase coa décima xuntanza de vehículos clásicos. O sábado 5 estará dedicado ás Vespas e ás motos, mentres que o domingo 6 será a quenda dos coches clásicos. A concentración e as inscricións realizaranse na Praza dos Fornos a partir das 11.00 horas. A participación custa 20 euros por vehículo e inclúe un vale de desconto de seis euros. Tamén se celebrará unha comida de irmandade na sidrería A Mina. A organización entregará trofeos en distintas categorías.
Para participar na xuntanza de vehículos ou solicitar información está dispoñible o teléfono 689 00 80 73.